Një ngjarje e rëndë ka tronditur vendin, pasi Policia bëri me dije se 17-vjeçarja Enisa Doda, me origjinë nga Burreli dhe banuese në Bathore, u mbyt një ditë më parë në plazhin e Velipojës. Trupi i adoleshentes, u gjet nga disa peshkatarë që po lundornin me peshkarexhën e tyre, në zonën e plazhit të quajtur Vilu, rreth 700-800 metra larg bregut të detit.
Enisa Doda kishte dalë me motor uji në det bashkë me 25-vjeçarin, Indrit Bajraktari, të cilin e kishte njohur në rrjetet sociale.
Ky i fundit, që tashmë është vënë në pranga, ende nuk ka dhënë një version të qartë për ngjarjen. Dy orë e gjysmë pasi është futur në ujë me adoleshenten e ndjerë, Bajraktari është pikasur nga pronarët e motorëve të ujit, teksa dilte me not në breg dhe është pyetur për vajzën. “E kam nxjerrë me kohë në breg, e mori xhaxhai i saj,”- ka thënë ai, ndërsa administratorët e motorëve të ujit, kanë shkuar të tërheqin mjetin lundrues.
Së fundmi, ngjarja e rëndë është thelluar edhe më tej, pasi mjekësia ligjore ka dalë në përfundimin se në trupin e vajzës janë gjetur të nxira dhe shenja të shumta dhune. Në qafën e saj është gjetur edhe çelësi i motorit të ujit.
Sipas protokollit çelësi është i lidhur me varëse që përdoret në rast se mjeti i lundrimit fiket dhe qëndron në vend, por është ende e pakuptueshme se përse ndodhej në qafën e të miturës. Nuk dihet ende, nëse vdekja e adoleshentes ka ardhur nga mbytja në det apo nga dhuna e ushtruar ndaj saj, dhe kjo gjë ka ngritur dyshime të forta, mbi atë se çfarë mund të ketë ndodhur mes 25-vjeçarit dhe të miturës, gjatë dy orëve e gjysmë që ishin në ujë.
Ndërkohë, Policia ka bllokuar lundrimin e të gjithë motorëve të ujit në plazhin e Velipojës. Uniformat blu kanë bërë edhe sekuestrimin e mjetit me të cilin po udhëtonte 17-vjeçarja Enisa Doda bashkë me Indrit Bajraktarin.
