Ministrja e Arsimit, Besa Shahini ka bërë me dijë se librat për nxënësit e klasës së parë deri në të shtatë do të shpërndahen falas!
Përmes një njoftimi në facebook, ajo ka sqaruar më tej se nga kjo skemë mbështetëse do të përfitjojnë edhe kategoritë e veçanta deri në klasë të 12-të.
“Kemi zgjeruar skemën mbështetëse të librave falas, me përfitues direkt nxënësit e klasave 1-7 dhe të gjithë nxënësit e kategorive të veçanta deri në klasë të 12-të. Ulim barrën financiare të familjeve shqiptare; Rrisim qasjen në arsim të grupeve vulnerabël”, shprehet ministrja.
Pas këtij lajmi ka reaguar edhe kryeministri Edi Rama i cili, në postimin e tij në rrjetet sociale, thotë se ky ishte një premtim i qeverisë së tij dhe se në vend të xhunglës të korrupsionit me tituj e duzinash alternativash të sajuara me lekë e kopjime të këqija, sot nxënësit marrin falas libra të Oxfordit, Cambridge dhe Pearson.
“LIBRAT FALAS ishin një stërpremtim i qeverive më parë, sot janë një realitet dhe jo vetëm kaq, po në vend të xhunglës së korrupsionit me titujt e me duzinat e “alternativave”, të sajuara për lekë e me arrna kopjimesh të këqija, sot nxënësit marrin FALAS libra të Oxford, Cambridge dhe Pearson, burimet më cilësore të dijes në Europë??”
Dje Ministria e Arsimit bëri me dije vendimin për hapjen e shkollave në shtator, në një kohë që jemi në mesin e pandemisë dhe rastet aktive të virusit kanë shkuar në 3551.
Ministrja e Shëndetësisë, Ogerta Manastirliu njoftoi se hapja e shkollave kërkon përgjegjësi maksimale nga institucionet përgjegjëse për garantimin e masave të distancimit social.
Por rritja e numrit të rasteve të reja çdo ditë, ka ardhur pikërisht për shkak të mungesës së kësaj përgjegjësie, sa individuale ashtu edhe institucionale.
Shkelja e protokolleve të sigurisë në plazhe apo edhe në institucione shtetërore, ka rezultuar me krijimin e vatrave të reja të virusit apo mbyllje të bashkive, çerdheve, materniteteve, gjykatave.
Optimizmi për hapjen e nevojshme të shkollave mund të mbështetet në ato pak statistika që tregojnë se fëmijët nuk janë në risk të madh ndaj virusit, por hapja e shkollave mund të rrezikojë mijëra mësues, kuzhinierë, pastrues, nxënës dhe familjet e tyre bashkë me gjyshërit e moshuar që janë grupmosha më e prekur nga virusi.
/Iconstyle.al
