Ministria e Punëve të Jashtme të Greqisë, ka marrë vendimin, që të gjitha pasaportat që kanë skaduar apo skadojnë, u shtyhet vlefshmëria deri më datë 31 dhjetor 2020.
Këto pasaporta do të jenë të pranuara edhe nga ana e Qendrave të Shërbimit të Emigrantëve, për të kryer çdo lloj procedure ligjore.
Ky është një lajm i mirë për emigrantët shqiptarë që jetojnë dhe punojnë në vendin fqinj.
Duket se ky lajm shton shpresat e shqiptarëve për një trajtim më të mirë dhe siguron marrjen e shërbimeve të tjera të nevojshme institucionale në Greqi, deri në fund të vitit 2020.
Vendimi i institucioneve greke është marrë nisur nga pandemia e COVID-19, teksa shumë shqiptarë ishin të detyruar që të ktheheshin në atdhe këtë periudhë për të aplikuar për pasaportat e reja duke sjellë edhe kaosin në pikat e Kapshticës dhe Kakavijës në kthim.
Radhë nuk kishte vetëm në pikat kufitare me Greqinë, por edhe në ambasadë dhe konsullatat në vendin fqinj. Komuniteti Shqiptar i Selanikut ka vlerësuar vendimin e qeverisë greke.
“Është vërtet një vendim shumë i dobishëm dhe është nga ato rastet e rralla kur qeveria greke tregon anën sociale dhe “mirëkuptimin” e saj, aq më tepër kur bëhet fjalë për dokumente identifikimi (pasaportë) të skaduara që janë kompetencë dhe përgjegjësi e shtetit shqiptar, të pranojë vlefshmërinë e tyre për një periudhë kohorë te caktuar.
Pak më parë vendimi u bë publik nga Ndërmjetësi Ndërkulturorë z. Fatos Malaj, të cilin gjejë rastin ta falenderojë për përpjekjet e mëdha dhe informacionet e sakta që na ofron. Fatkeqësisht z. Malaj ka mbetur thuajse i vetëm në këtë pjesë për shkak se “ata” të cilët “përfaqësojnë” komunitetin ndodhen me pushime të gjata për më shumë se 3 vjet.
Në çdo rast, është për t’u përshëndetur ky vendim pasi i vjen në ndihmë me mijëra bashkëatdhetarëve tanë cilët përballen me një mori problemesh dhe kështu do mund të rinovojnë dokumenat” thuhet në reagimin e Komunitetit Shqiptar të Selanikut.
