Gjithnjë e më shumë po vërtetohet se shqiptarët janë lënë në mëshirë të fatit në këtë periudhë pandemie, me radhët e gjata të formuara në kufi, bllokimet në aeroport dhe detyrimin për t’iu drejtuar privatit për kryerjen e analizave të COVID-19 që duhej të ishin FALAS.
Pas radhëve kilometrike të Kakavijës, ku një fëmijë ndërroi jetë ditën e djeshme pasi u shtyp nga një autoambulancë, (shiko këtu), një tjetër grup shqiptarësh të nisur drejt Polonisë është bllokuar në Aeroportin e Varshavës, ndonëse me dokumentacion të rregullt.
Shteti i Polonisë kishte ndryshuar regjimin e hyrjes së shtetave shqiptarë, dhe askush nga Ministria e Punëve të Jashtme e vendit tonë nuk denjoi t’i njoftojë këta shtetas të cilët u bllokuan në aeroportin e Varshavës pa kurrëfarë shpjegimi.
Në redaksinë tonë ka mbërritur një mesazh ku një qytetare e shqetësuar shprehet se shteti i ka lënë në mëshirë të fatit, dhe se po torturohen aeroporteve bashkë me fëmijët:
“Të gjithë shqipëtarët që kanë ikur sot në Poloni, me dokumentacion të rregullt, i ka bllokuar aeroporti i Varshavës që në orën 11 të paradites, duke i thënë nuk lejoheni të hyni në Poloni, ndërkohe ne faqen zyrtare ne lejohemi. Në Rinas kaluam pa problem. Shteti ynë nuk po bën asgjë, per ne mban pergjegjesi sepse nuk duhej te na linin që në Rinas nqs nuk lejohemi, po tallen me ne. Na kanë lënë në mëshire te fatit. Jemi me fëmijë po torturohemi. Ju lutem të reagojmë që t’i ndërgjegjesojme pak, faleminderit po e publikuat”.
Vetëm pas këtij bllokimi në aeroport, Ministria e Jashtme më në fund reagoi duke thënë se Polonia ka ndryshuar regjimin e hyrjes së qytetarëve shqiptarë dhe për shkak të këtij ndryshimi, ditën e shtunë, më 15 gusht 2020, qytetarë shqiptarë, të cilët u nisën në udhëtim drejt aeroportit të Varshavës me linjën ajrore të Kompanisë Polake, LOT Airline, nuk janë lejuar që të hyjnë në Poloni.
“Ambasada e Republikës së Shqipërisë në Poloni në komunikim të ngushtë me disa shtetas të bllokuar në aeroportin e Varshavës, u vu menjëherë në komunikim me autoritetet vendase dhe me drejtuesit e kompanisë ajrore LOT Airline, duke arritur të bëhej e mundur vendosja e një avioni charter në dispozicion të shtetasve, për t’i rikthyer në atdhe, sot, e diel, 16 gusht 2020, herët në mëngjes”, thuhet në njoftim.
Por a nuk duhet të ishin njoftuar paraprakisht? A nuk është detyra e ministrisë që të njoftojë shtetasit shqiptarë që duhet të udhëtojnë se çfarë kushtesh dhe rregullash kanë shtetet e tjera?
Papërgjegjshmëria e shtetit tonë është vënë re këto ditë edhe me radhët e gjata në Kakavijë, ku qytetarët u dyndën të kalonin kufirin për në Greqi, për t’i shpëtuar karantinimit, i cili nis nga sot, më 16 gusht. Kush hyn sot në Greqi do të duhet t’i nënshtrohet karantinimit për 7 ditë.
Shqiptarët u dyndën që të përfitonin edhe nga tamponi falas i shtetit grek që ofrohej në kufi, ndërkohë që Ministria e Jashtme i kujtonte se për të shmangur radhët e gjata, mund ta kryenin tamponin në laboratorët privatë të licencuar. Por si mund t’i thuash një qytetari që të shkojë të bëjë tamponin 95 euro në laboratoret private, kur mund ta bëjë falas në kufirin grek?
Në një kohë që tamponi i COVID-19 duhet të jetë falas, sipas ligjit (shiko këtu), qeveria zgjedh që këtë shërbim t’ua kalojë strukturave private ku na duhet të paguajmë 95 euro për tamponin (për të parë nëse je i infektuar me Covid) dhe 40 mijë lekë të vjetër për analizat serologjike (për të parë nëse e ke kaluar apo jo Covid).
“Iconstyle.al” e ka ngritur vazhdimisht shqetësimin e analizave në laboratoret private të cilat duket sikur kanë rënë dakord në mënyrë që të mos e lejojnë konkurrencën për uljen e çmimeve të analizave (lexo këtu); dhe i ka kërkuar zyrtarisht Autoritetit të Konkurrencës të shohë mënyrën sesi është ndërtuar dhe funksionon kryerja e analizave.
E ndërkohë që shteti paturpësisht të thotë “shko bëj analizën në privat”, ende nuk ka një listë orientimi që të tregojë për kë shtet vlen kjo analizë! Një listë që të tregojë kushtet e vendosura nga secili shtet për të udhëtuar, është tepër e nevojshme dhe do të ofronte siguri të madhe për qytetarët shqiptarë. Kjo pasi nuk i ka detyrim ligjor një shtet një shteti tjetër, nëqoftëse nuk kanë një marrëveshje, ndaj edhe mund t’i lërë udhëtarët në mëshirë të fatit siç ka ndodhur këtë javë.
