Drejtori i Përgjithshëm i Policisë së Shtetit urdhëroi pezullimin e menjëhershëm nga detyra të punonjësit e Policisë A. Ç., i cili tentoi të kalojë pa radhë një automjet, që ishte me targa greke, ndërkohë që qindra shqiptarë kishin me orë të tëra në radhë duke pritur të kalojnë kufirin në Kakavijë.
Në videon e publikuar nga Ora News shihen disa qytetarë që i dalin para punonjësit të kufirit, i cili po tenton të kalojë pa radhë një makinë greke drejt kufirit.
“Ndalo o i korruptuar”, dëgjohen ata.
Menjëherë pas kësaj videoje, janë marrë masat për pezullimin e tij nga detyra dhe nisjen e hetimeve:
“Punonjësi i Stacionit të Policisë Kufitare Kakavijë, duke shpërdoruar detyrën, ka tentuar të kalojë jashtë radhe një automjet me targa greke, për në shtetin grek. Drejtoria e Standardeve Profesionale në Drejtorinë e Përgjithshme të Policisë së Shtetit ka nisur menjëherë hetimin disiplinor ndaj punonjësit të Policisë, për shkelje të rëndë”.
Kaosi i madh dhe situata e pazakontë në Kakavijë këto tri ditët e fundit ka bërë që Ministrja e Mbrojtjes, Olta Xhaçka dhe drejtori i Agjencisë Kombëtare të Mbrojtjes Civile, Haki Çako të nisen drejt kësaj pike kufitare për të parë më afër gjendjen e qytetarëve dhe punës që po bëhet nga pala jonë.
Gjithashtu janë nisur drejt Kakavijës edhe efektivë të Batalionit të Mbështetjes Rajonale të Forcave të Armatosura me një automjeti të posaçëm me 10 mije litra ujë si dhe ekipe mjekësore për t’u ardhur në ndihmë qytetarëve të bllokuar.
