Të qenit i pasur ka mjaft favore, veçanërisht në kohë pandemie! E ndërsa qeveria e Ministria e Shëndetësisë apelojnë për rritjen e kapaciteteve në spitalet COVID, 20 persona janë larguar me charter të dedikuar për t’u kuruar nga koronavirusi jashtë Shqipërie.
Report Tv bën me dije ekskluzivisht se janë të paktën 20 persona që janë larguar nga Rinasi me charter të dedikuar në harkun kohor prej 3 muajsh. Sipas zyrtarëve, aplikime ka çdo ditë dhe shumica i kanë besuar më tepër eksperiencës së Turqisë, por edhe të Italisë, si një nga vendet evropianë më të prekura nga ky virus.
Në foton që Report Tv ka siguruar, shihet teksa charteri dezifentohet përpara, ndërsa në fluturim merren me vete dhe pajisje mjekësore.
Por duke qenë se ministrja Ogerta Manastirliu flet për rritjen e kushteve nëpër spitale, atëherë përse të pasurit po largohen jashtë?
Së pari, shqetësimi që na lind është mungesa e transparencës, nëse këta persona kanë paguar nga xhepi i tyre, për këto udhëtime apo jo!
Së dyti, kjo nënkupton se kush nuk ka të ardhura mjaftueshëm për t’u kuruar jashtë Shqipërisë dhe privilegjet që ia fal statusi, është i destinuar të kurohet në Shqipëri, aty ku propagandohet shëndetësia falas, por të faturojnë edhe për testet e COVID-19 që duhet të jenë falas!
Oligopol me testet serologjike!
Prej disa ditësh në laboratoret private ka nisur testimi serologjik për Covid-19 për shtetasit shqiptarë me vendim të Ministrisë së Shëndetësisë. Për arsye ende të paqarta qeveria zgjodhi që këtë shërbim në vend që ta ofronte falas sikundër e parashikon ligji shqiptar (Lexo këtu), ta kalonte në këto struktura private.
Mirëpo, kur kanë kaluar vetëm disa ditë nga certifikimi i këtyre laboratoreve nga Instituti i Shëndetit Publik, “iconstyle.al” ka vënë re që është bërë edhe shkelja e parë. Nga një vëzhgim i kryer rezulton se shumë prej laboratorëve që e ofrojnë këtë shërbim kanë të njëjtin çmim, 4000 lekë të reja.
Vendosja e njëkohshme nga këto laboratore e çmimeve për kryerjen e testit serologjik, ngre dyshime për shkelje të kushteve të konkurrencës dhe marrëveshje të ndaluara në treg, siç janë të ashtuquajturat “Kartele”. Për ata që nuk e dinë, kartelet janë marrëveshje që bëjnë bashkë dy ose më shumë biznese me qëllim që të shmangin konkurrencën e lirë në treg. Ato gjithnjë formohen për qëllime të caktuara si p.sh. karteli i çmimeve ka për qëllim që anëtarët e kartelit të mos konkurrojnë me njëri-tjetrin në uljen e çmimeve.
Çfarë parashikon ligji shqiptar në këto raste?
Një gjë e tillë nuk është thjesht e gabuar në planin moral dhe etik, por bie në kundërshtim të plotë me ligjin që mbron konkurrencën e lirë në Republikën e Shqipërisë. Ligji Nr.9121, datë 28.7.2003 “PËR MBROJTJEN E KONKURRENCËS” neni 4 dhe neni 9 e ndalon qartazi diçka të tillë dhe parashikojnë penalitete të larta për shkelësit. (Lexo këtu të plotë)
Institucionet rregullatore të tregjeve dhe Autoriteti i Konkurrencës, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, duket se po qëndrojnë në vend numëro.
/Iconstyle.al
