Kreu i PDK-së, Kadri Veseli është infektuar me koronavirus.
Mediat në Kosovë bëjnë me dije sot se Veseli ka rezultuar pozitiv në testin për COVID-19, por deri më tani nuk ka asnjë reagim zyrtar në lidhje me këtë lajm.
Gjithashtu sot raportohet se Jakup Krasniqi, ish-kryetari i Kuvendit të Kosovës ka rezultuar i infektuar me koronavirus.
Lajmin e ka konfirmuar vetë Krasniqi për Gazetën Express. Gjendja shëndetësore e Krasniqit është e qendrueshme dhe ai po trajtohet në shtëpi.
Pak kohë më parë, kryetari i Lidhjes Demokratike të Kosovës, Isa Mustafa bëri me dije se është infektuar me virusin, por gjendja e tij shëndetësore vazhdon të jetë e qëndrueshme.
Zëdhënësja e LDK-së, Gentiana Azemi në një deklaratë të dhënë për Telegrafin ka thënë se Mustafa do t’i njoftojë qytetarët sapo ta kapërcejë këtë sfidë.
“z.Mustafa ka qenë transparent dhe ka njoftuar opinionin në momentin kur ka dalë pozitiv me Covid-19. Iu ka përmbajtur të gjitha rregullave të vetizolimit dhe ai vet do ta njoftojë opinionin kur ta kapërcejë këtë sfidë. Në vijim, gjendjen shëndetësore e ka krejtësisht stabile dhe po sillet sipas rekomandimeve të mjekëve tanë”, është shprehur ajo.
Me COVID-19 janë infektuar edhe disa deputetë të LDK-së, disa prej tyre tashmë janë shëruar.
