Një sherr me armë u raportua më datë 16 korrik, nga i cili mbetën të plagosur Rois Babasi, djali i ish-deputetit të PD Ndriçim Babasi, dhe një 39-vjeçar me iniciale G., B.
Por sipas informacioneve të fundit nga Hashtag.al, në sherr ka qenë i përfshirë edhe Fatmir Hysenbelliu, ndërsa personi me iniciale G., B., është shoferi i tij Gazmir Bushaj.
Në dosjen policore të siguruar nga Hashtag.al për këtë ngjarje, thuhet se në konflikt janë përfshirë, djali i Irfan Hysenbelliut, Fatmir Hysenbelliu dhe shoferi i tij Gazmir Bushaj, dy djemtë e deputetit Tom Doshi, James dhe Marcos Doshi, djemtë e Ndriçim Babasit, Even dhe Rois Babasi, Ervis Bajraktari dhe Ritvan Toskaj.
Konflikti ka ndodhur mes Fatmir Hysenbelliut dhe djemve të Tom Doshit dhe Ndriçim Babasit si dhe Ervis Bajraktarit në dalje të një lokali në zonën e ish-bllokut:
“Sipas dëshmisë së shtetasit Gazmir Bushaj rreth orës 00:30 pasi ai së bashku me Fatmir Hysenbelliun kanë dalë nga lokali në ish-bllok dhe mbrapa tyre kanë ardhur disa persona mes të cilëve ai i identifikon si Rois Babasi që sipas tij mbante në dorë një pistoletë në dukje Berrete. Rois Babasi sipas tij ishte në shoqërinë e një prej djemve të Tom Doshit dhe truprojës së tij. Ai thotë se kanë vrapuar për të shmangur konkflitin me këta persona që sipas tij ishin të armatosur. Ai vazhdon dëshminë duke thënë se Rois Babasi ka qëlluar në drejtim të Fatmir Hysnenbelliut dhe më pas duke vrapuar Bushaj i ka dalë përpara për ta mbrojtur atë dhe ka mbetur i plagosur ndërsa personat e tjerë më pas janë larguar”.
Në njoftimin zyrtar të policisë më datë 16 korrik, nuk thuhet se ka pasur palë të treta të përfshira përpos Rois Babasit dhe Gazmir Bushajt. Por Hashtag.al shkruan se sherri ndodhi pas një konflikti të vjetër mes Hysenbelliut dhe këtyre shtetasve që besohej se ishte sqaruar me kohë!
Rois Babasi
Në dëshminë e tij Rois Babasi i cili nuk ka pranuar të marrë avokat thotë se nuk ka mbajtur asnjëherë armë dhe se nuk është pjesë e ngjarjes, Ai gjithashtu ka deklaruar se është i plagosur dhe se shtetasi që e ka goditur quhet Gaz Bushi për të cilin thotë se nuk e njeh.
Njoftimi i policisë më datë 16 korrik 2020:
Zbardhet dhe dokumentohet ngjarja e ndodhur në orët e para të mëngjesit të sotëm, ku mbeti i plagosur me armë zjarri 39-vjeçari G. B.
Vihet në pranga autori kryesor i dyshuar për plagosjen e 39-vjeçarit.
Procedohet penalisht edhe i dëmtuari, shtetasi G. B.
Specialistët për Hetimin e Krimit në Komisariatin e Policisë Nr. 2, menjëherë pas ngjarjes së ndodhur rreth orës 00:30, në rrugën “Ibrahim Rugova”, ku pas një konflikti për motive të dobëta mbeti i plagosur me armë zjarri në këmbë, shtetasi G. B., 39 vjeç, i cili u dërgua në spital dhe ndodhet jashtë rrezikut për jetën, organizuan punën duke ngritur pika kontrolli, krehje të zonës, si dhe u ngrit grupi hetimor për zbardhjen e plotë të ngjarjes.
Falë reagimit në kohë dhe veprimeve të shpejta e profesionale u bë e mundur kapja e autorit të dyshuar të plagosjes me armë të 39-vjeçarit. Në përfundim të veprimeve të para hetimore u bë arrestimi në flagrancë i shtetasit R. B., 22 vjeç, banues në Tiranë, i dyshuar si autori kryesor i ngjarjes.
Gjithashtu u procedua penalisht, për veprën penale “Plagosja e lehtë me dashje”, shtetasi i dëmtuar G. B, pasi dyshohet se ka dëmtuar me mjet prerës në pjesën e krahut autorin e ngjarjes, shtetasin R. B.
Ndërkohë vijon puna për kapjen e personave të tjerë që mund të jenë të implikuar apo kanë dijeni për ngjarjen.
Materialet hetimore në lidhje me këtë ngjarje i kaluan Prokurorisë pranë Gjykatës së Shkallës së Parë Tiranë, për veprime të mëtejshme, për veprat penale “Plagosja e rëndë me dashje” dhe “Mbajtja pa leje dhe e armëve, armëve shpërthyese dhe municionit” në ngarkim të shtetasit R. B, si dhe për veprën penale “Plagosje e lehtë me dashje” në ngarkim të shtetasit G. B.
/Hashtag.al
