Është vërtetuar tashmë se fryrja e çmimeve nga ana e operatorëve celularë në Shqipëri, nuk është një gjë e re, për sa kohë që askush nuk i monitoron.
Jo më larg se pak muaj më parë, në shkurt 2020, u vu re se tre operatorët celularë në vend, kishin rritur çmimin e paketave mujore me 200 lekë dhe kishin rritur koston e rimbushjes nga 100 në 200 lekë.
Ndërhyrja e Autoritetit të Konkurrencës pasi kjo çështje u bë publike në media, (dhe pasi ishin faturuar mijëra shqiptarë me çmimet e reja), solli rikthimin e tarifave fillestare për paketat tridhjetë ditore standarde me parapagesë.
Por kjo nuk është hera e parë që çmimet fryhen pa kurrfarë logjike dhe mjafton të marrim shembullin e Vodafone në shtetin fqinj Itali, për të parë sesi ndryshojnë çmimet e paketave të shërbimeve celulare në krahasim me operatorin që mban të njëjtin emër në Shqipëri!
Pyetja kryesore është: Përse një abonent i Vodafone në Shqipëri duhet të paguajë më shumë dhe të marrë më pak, në një kohë që një abonenti të Vodafone në Itali, i ndodh e kundërta?
Më konkretisht, Paketa Vodafone Red Executive në Shqipëri, kushton 11800 lekë të rinj në muaj dhe duhet të lidhësh një kontratë të detyrueshme për 24 muaj. Paketa përfshin internet 20 GB, dhe pas konsumimit të mundëson Internet Pa Limit, por me shpejtësi të reduktuar deri në 256 kbps.
Minutat ndërkombëtare janë 400 në muaj dhe mesazhet 100 në muaj drejt 41 vendeve.
Risia e Vodafone është shërbimi i muzikës Tidal, (që është i njëjtë me atë të Spotify), por oferta e vetme promocionale që Vodafone ka bërë aktualisht, pa dallim nga çdo abonent, (si ai që paguan 11800 në muaj apo si ai që paguan 1800 në muaj) është: paguaj 3 muaj për 1200 lekë dhe përfito 3 muaj të tjerë falas. Pas kësaj periudhe duhet të paguash 400 lekë në muaj ku përfshihet trafiku falas në aplikacionin e Tidal.
Tani le të bëjmë krahasimin me një tjetër paketë Red në Vodafone Itali, ku kontrata mund të lidhet për 12 muaj dhe jo 24. Për vetëm 18,99 euro në muaj paketa ofron internet 40 GB si dhe internet pa limit për të gjitha aplikacionet: WhatsApp, Facebook Messenger, Skype, Telegram, Viber, Hallo, Hangout, We Chat , Call+, Message+, iMessage, Imo, Discord.
Minutat ndërkombëtare drejt vendeve të Bashkimit Europian janë pa limit.
Gjithashtu paketa ofron Giga pa limit për hartat online, si dhe muzikën përmes, Apple Music, Tidal, Spotify, Deezer Music, iTunes, Radio Deejay, RTL 102.5, Radio 105, Radio Italia, RDS, R101, SoundCloud.
Ofertat gjatë karantinës!
Gjatë periudhës së karantinimit, kur populli kishte nevojë më shumë se kurrë për argëtim, Vofafone në Itali krijoi një paketë promocionale për ta përfituar Tidal me 4 euro për 4 muajt e izolimit.
Madje në disa paketa (Shake it Easy) mund të aktivizosh falas Tidal për 6-12 muajt e parë.
Dhe në fakt është për të ardhur keq kur bëjmë krahasime të tilla mes paketave që kanë një diferencë 5 fish në çmim, dhe për më tepër kur e mendon që jemi një vend që nuk krahasohet me Italinë, në aspektin ekonomik apo të zhvillimit.
Një rol të rëndësishëm për monitorimin e këtyre paketave duhet të luajë Autoriteti i Konkurrencës, i cili, herën e fundit që operatorët telefonikë rritën çmimet, reagoi duke hapur hetimet vetëm kur çështja u bë publike në media:
“Bazuar sa më sipër si dhe nisur nga shqetësimet në masmedia mbi rritjen e çmimit të paketave celulare 30 ditore me parapagesë me 200 lekë, Autoriteti i Konkurrencës në bazë të nenit 28 të ligjit nr. 9121, datë 28.07.2003 “Për mbrojtjen e konkurrencës”, i ndryshuar, vendosi të realizojë një monitorim në këtë treg në lidhje me çmimin e paketave mujore që hidhen në treg nga operatorët celularë Vodafone Albania, Telekom Albania dhe Albtelecom”, thuhej në njoftim në shkurt të 2020-s.
Dhe kjo nuk ishte hera e parë që ndodhte një gjë e tillë, pasi edhe në mars 2016, të tre kompanitë celulare ulën periudhën e vlefshmërisë së paketave mujore nga 30 në 28 ditë.
Asokohe, Autoriteti i Konkurrencës nisi hetimet por me vendimin nr. 475, datë 21.09.2017, vendosi “mbylljen e hetimit paraprak në tregun me pakicë të shërbimeve celulare dhe dhënien e disa rekomandimeve”.
U desh ndërhyrja e Autoriteti i Komunikimeve Elektronike dhe Postare (AKEP) që nxori Urdhrin nr. 64, datë 26.03.2018 “Për vlerësimin e ndryshimit të kohëzgjatjes së vlefshmërisë së paketave tarifore celulare me parapagim nga 30 në 28 ditë”, që të rikthehej kohëzgjatja e vlefshmërisë së paketave me parapagim nga 28 ditë në 30 ditë.
/Iconstyle.al
