Janë arrestuar dy efektivë të policisë Rrugore, pasi akuzohen se i kanë kërkuar seks dhe para një shofereje, për t’i kther fuoristradën ‘’Range Rover’’ që ishte bllokuar nga shtatori i 2019-s.
ReportTv mëson se të arrestuarit janë Laurenc Duda dhe Henrik Zelija të cilët mbrëmjen e djeshme rreth orës 11:00 janë ndaluar në zbatim të urdhrit të prokurorit Behar Dibra.
Ka qenë shoferja ajo e cila bëri ankesën, pasi sa herë paraqitej për të marrë mjetin, i nxirrej një pengesë nga dy policët.
Henrik Zelija rezulton se ka mbajtur detyrën e oficerit të Policisë Gjyqësore pranë Komisariatit Rajonal të Policisë Rrugore Tiranë, ndërsa eprori i tij ka qenë Laurenc Duda shef seksioni për verifikimin e shkeljeve administrative.
SPAK bën me dije se ‘’janë siguruar prova se me veprimet dhe mosveprimet me dashje, në një periudhe kohore relativisht të gjatë, kanë zvarritur procedurat ligjore të dorëzimit të automjetit me qëllim përfitimin e favoreve të mësipërme, duke konsumuar elementë të shpërdorimit të detyrës dhe të korrupsionit pasiv’’.
Ky është rasti i parë kur SPAK që pas krijimit vë në pranga zyrtarë si në këtë rast policë për afera seksuale dhe korrupsioni.
/Report Tv
