Detaje të reja janë mësuar pas ngjarjes së rëndë që tronditi kryeqytetin mbrëmjen e djeshme ku në një banesë në zonën e Kombinatit u gjetën të vetëflijuara nënë e bijë, ndërsa vajza tjetër në gjendje të rëndë.
Gazetari Bledi Mane tha sot në emisionin “Shqipëria Live” në Top Channel se babai i vajzave gjithashtu i kishte dhënë fund jetës disa kohë më parë, duke u vetëflijuar.
Dyshimet e para, nisur edhe nga deklarata e kunatit të Zhaneta Josifit, janë se ajo dhe vajzat Anisa e Blerta besonin se vetëvrasja do të mund t’u sillte një jetë të dytë, më të mirë.
“Kishte një vit që nuk e takoja Anisën. Kur kam shkuar në shtëpi kunata dhe vajza tjëtër më kanë thënë që se ka mbushur ende afatin për të dalë dhe nëse unë do e shihja Anisën e ndëshkonte Zoti”, ka thënë ai për News 24.
Vajza 30-vjeçare, Anisa u gjend gjysmë e dekompozuar dhe sipas ekspertëve të mjekësisë ligjore dyshohet se trupi i saj mund të ketë qëndruar me muaj i pajetë brenda në banesë.
Nëna e saj Zhaneta dyshohet se ka ndërruar jetë 2-3 ditët e fundit. Top Channel mëson se Zhaneta dhe Blerta e lyenin trupin e pajetë të Anisës me vaj dhe uthull, por edhe me solucione të tjera.
Mjekësia ligjore po ashtu ka dërguar për të bërë ekspertimin e lëndëve që janë përdorur në trupin e Anisës. Mbrëmjen e djeshme, në një komunikatë për mediat, drejtori i Policisë së Tiranës tha se trupi i pajetë ka qenë i mbuluar me batanije dhe jorgan, i mumifikuar.
/Top Channel
