Partia Demokratike deklaroi pak ditë më parë se kryeministri Edi Rama e ka fshehur faktin që ka pasur të prekur me koronavirus në zyrat e kryeministrisë.
Ndërkohë, në lidhje direkte me News 24, shefja e Inspektoriatit Shëndetësor Shtetëror Vjollca Braho u shpreh se nuk ka asnjë informacion që të ketë pasur të infektuar në Kryeministri.
Sipas saj, nga 183 inspektime në institucione shtetërore, në dy prej tyre është marrë masë për mbyllje provizore, në Bashkinë e Durrësit dhe në hipotekën e Durrësit.
“Inspektorati Shtetëror Shëndetësor kontrollin gjithçka në Republikën e Shqipërisë. , kemi kryer 183 inspektime në institucione shtetërore dhe në dy prej tyre është marrë masë për mbyllje provizore, në Bashkinë e Durrësit dhe në hipotekën e Durrësit, ku ka pasur të infektuar. S’kam informacion për të infektuar në kryeministri nga njësitë vendore të kujdesit shëndetësor. Unë bëj vetëm pjesën e inspektimit. Për këtë pyesni Institutin e Shëndetit Publik”.
Ministria e Shëndetësisë vuri në dukje sot se ditet e fundit po vihet re shtim i rasteve në aktivitete biznesi, ndërmarrje me shumë punëtorë, institucione publike dhe private.
“I bëjme apel të gjithëve: Ju lutemi respektoni rregullat. E vetmja mënyrë për të ndaluar përhapjen e infeksionit është duke ruajtur distancën fizike prej 1.5 metër nga njëri tjetri, duke ruajtur higjienën personale dhe duke larë duart vazhdimisht, bizneset dhe institucionet duke respektuar protokollet e përcaktuara”, thuhej në njoftim.
/Iconstyle.al
