Xhensila Myrtezaj, ndonëse është një nga këngëtaret më të famshme në vendin tonë, njihet si një person shumë hermetik kur vjen puna te jeta e saj personale.
Deri tani ajo ka ndarë me ndjekësit foto me të ëmën, për të cilën ka folur edhe në intervista, duke e konsideruar mikeshën e saj më të mirë.
Të kundërtën ka bërë me të atin, për të cilin nuk ka folur kurrë publikisht.
Për herë të parë këngëtarja ka postuar një foto të tijën të vjetër në 22 maj të vitit që lamë pas, në të cilën shfaqen e ëma shtatzënë, babai, gjyshja dhe gjyshi.
“Nuk më priste vetëm mami, babi, gjyshja e gjyshi, por edhe Bes Kallaku! Një muaj para ditës së Diellit”, shkruante asokohe Xhensila bashkëngjitur me foton.
Mirëpo, sonte e ftuar në emisionin “Në kurthin e Piter Pan” , artistja ka folur për herë të parë për babain.
Njëri prej fëmijëve e ka pyetur se çfarë roli ka patur nëna në jetën e këngëtares, duke qenë se prindërit e saj janë ndarë para shumë viteve dhe ajo është detyruar të rritet pa të atin.
Duke çmuar raportin me të ëmën, për të cilën tregoi se ka qenë edhe nënë, edhe baba për të, Xhensila shtoi se rëndësi ka që secili prej tyre të jetë i lumtur.
Kjo pyetje e ka emocionuar shumë artisten e cila me lot në sy tha se pavarësisht të gjithave të atin e do shumë.
“Mami ka qenë gjithnjë pjesë e jetës sime dhe ka qenë për mua edhe nënë, edhe baba. Gjithsesi për mua rëndësi ka që ata të jenë të lumtur. Padyshim edhe babain e dua shumë.”
Rreth dy muaj më parë, teksa ishte e ftuar te “E diela shqiptare” këngëtarja tregoi se nëna e saj jetonte në Kosovë, ku kishte gjetur atë që ajo e cilësoi si “princi i kaltër”.
