Është thelluar më tej skandali i abuzimit seksual me 15-vjeçaren nga Paskuqani nga roja i shkollës Abaz Doku dhe 3 të rinj, të cilët janë arrestuar pas denoncimit nga e mitura.
Gazetari Elton Qyno ka raportuar se një fakt i ri ka dalë gjatë hetimeve, ku në telefonin e Dokut prokuroria ka gjetur plot 19 video erotike, ku duket vajza teksa abuzohet seksualisht nga Abaz Doku, dhe tre personat e tjerë me iniciale K.P, R.O dhe F.B.
Sipas dosjes së prokurorisë dy nga materialet filmike i janë shitur Abaz Dokut në vlerën 2 mijë lekë të vjetra, nga dy djemtë R.O dhe K.P, të cilët kishin abuzuar së bashku me vajzën e mitur dhe aktin abuzues e kishin filmuar.
Këto video kanë rënë në dorë të Abaz Dokut, i cili më pas ka filluar presionet ndaj të miturës me të cilën ka abuzuar nga muaji prill i 2019 deri në maj 2020.
Prokuroria e Tiranës ka zbuluar edhe përfshirjen e dy vajzave të reja, që tashmë janë në vitin e parë të gjimnazit, të cilat sipas kallëzueses S.Th, janë abuzuar seksualisht nga Abaz Doku dhe disa djem të tjerë të shkollës.
Situata bëhet edhe më e rëndë, pasi ka të dhëna se në këtë skandal seksual me nxënëset e shkollës, mund të jenë implikuar dhe disa mësues, mirëpo ende nuk ka gjë zyrtare.
Kjo ngjarje është bërë publike pak kohë më parë dhe ka shkaktuar një reagim masiv tek qytetarët, të cilët organizuan edhe protesta ku kërkonin rikthimin e dënimin me vdekje.
