Ndërkohë që sektori i turizmit në Shqipëri është në kushtet e mbijetesës, ministri Blendi Klosi u shpreh në një intervistë të fundit se nuk ka pasur rezervime të anuluara, por vetëm të shtyra ose në pritje.
Por kreu i Unionit Turistik Rrahman Kasa, nuk e bëri kaq rozë situatën kur tha sot në studion e “Ditë e Re” në RTV Ora, se pandemia anuloi gati 80 për qind të rezervimeve të bëra në Shqipëri.
Ai tregoi se vetëm për muajin maj, ishin rezervuar 80 për qind të hoteleve në vijën bregdetare shqiptare, dhe sot ato janë anuluar:
“Deri para situatës së pandemisë, ne kishim hotele që ishin rezervuar rreth 80% për sezonin veror. Tani për hir të situatës ata kanë anuluar pushimet dhe bizneset detyrohen të fillojnë nga e para”.
Për ta kuptuar më mirë me shifra më konkrete, Kasa u shpreh se data e fillimit të sezonit ka qenë 9 maji, që do të thotë se deri tani mund të kishin mbërritur në vendin tonë mbi 200 avionë charter.
“Në situatë normale nga maji deri tani duhet të kishin ardhur mbi 200 avionë charter” theksoi kreu i Unionit Turistik.
Pra pandemia shkaktoi anulimin e rezervimeve në një masë të madhe dhe goditjen që i është bërë sektorit të turizmit në këtë periudhë, nuk mund ta shohim me optimizëm. Kasa u shpreh se janë duke menduar edhe për oferta speciale për të tërhequr turistin shqiptar, në mënyrë që paratë që ka ndërmend t’i shpenzojë jashtë, t’i shpenzojë brenda kufijve.
Jo më larg se dy ditë më parë, Blendi Klosi tha në një intervistë për Report tv, se në datën 12 qershor do të nisin charterat e parë nga Bjellorusia dhe nga Ukraina, ndërsa sa u përket prenotimeve Klosi u shpreh se asgjë nuk është anuluar nga frika e pandemisë, por vetëm janë shtyrë ose janë në pritje.
Në fakt, të vetmet rezervime që nuk janë anuluar janë ato që janë bërë me parapagim, tha dje kryetari i Sektorit të Hotelerisë, Zak Topuzi për iconstyle.al.
Ai u shpreh se ministri e ka fjalën për ato kontrata të turistëve që vijnë me charter, që kanë bërë paradhënie dhe normalisht janë në pritje. Por këta turistë përbëjnë vetëm 5 për qind të të gjithë turizmit, dhe nuk luajnë ndonjë rol domethënës në ngritjen e turizmit në përgjithësi:
“Ato hoteleri që janë prenotuar me chartera janë 5 për qind e turizmit në Shqipëri, pra një bllok hotelesh në Golem dhe pak të tjerë, por nuk përbejnë këta të gjithë bazën e turizmit. Si zgjidhje është që, ai ka paguar paradhënie, e mban pending një prenotim. Por 80 për qind e turistëve vijnë me mjetet e tyre, 60 për qind janë Kosova, Italia dhe Maqedonia. Nga kontaktet që kemi me 250 hotelet që janë në linjë direkte vijon të jetë situata e njëjtë pa lëvizje të mëdha. Thjesht tentojnë njerëzit por nuk ka akoma situatë të qartë”.
Pra, situata duket haptazi më problematike për këtë sektor nga sa e paraqet ministri i Turizmit!
