Më 4 qershor do të mbahet një marshim paqësor te “Nënë Tereza”, në shenjë proteste për ngjarjen e rëndë të pak ditëve më parë në Tiranë, kur u mësua se një 15-vjeçare përdhunohej dhe shantazhohej për 3 vite me radhë nga roja i shkollës dhe një grup adoleshentësh.
Ngjarja shokoi të gjithë opinionin publik, pasi fatkeqësia e vajzës përflitej në kafenetë e lagjes prej kohësh dhe askush nuk i vinte asaj në ndihmë! Edhe pasi ngjarja u bë publike, pati një vonesë të pajustifikueshme nga ana e institucioneve përgjegjëse për rastin.
Vetë ministrja e Arsimit Besa Shahini, reagoi tepër vonë për dhunën duke dalë mbrëmë me një video për rëndësinë e denoncimit të dhunës. Ajo foli për politikën e shkollës si një “hapësirë e sigurt”, por vetë abuzimi i 15-vjeçares ndodhi para syve të mësuesve, shokëve dhe shoqeve të shkollës.
Ndaj për të protestuar kundër abuzimit ndaj femrave dhe kundër dhunës ndaj fëmijëve me sloganin: “Për fëmijërinë e vjedhur”, në datën 4 qershor ora 16:00 do mbahet një marshim në sheshin “Nënë Tereza”.
https://www.instagram.com/p/CA6ATo6g9-s/
Nismëtarja e marshimit, Erisa Fjolla bën thirrje për të gjithë qytetarët që të marrin pjesë të shumtë në numër, për të mbrojtur dinjitetin e shkelur të vajzës 15-vjeçare dhe për të protestuar kundër dhunës ndaj fëmijëve dhe femrave.
“Do jetë një marshim paqësor. Duhet të ngremë zërin dhe t’i jepet fund këtyre abuzimeve seksuale dhe përdhunimeve e dhunimeve fizike. STOP! I vodhët fëmijërinë disa vajzave te reja por STOP! Të ngremë zërin t’i japim fund. Nuk kam për qëllim dhunën po kam për qëllim ndërgjegjësimin e këtij populli, i cili nuk ka nxjerrë zë tërë këto kohë. Shumë faleminderit për mbështetjen! #stopabuzimeve #tedrejtategrave #stopabuzimeveseksuale”, shkruan ajo në Instagram.
https://www.instagram.com/p/CA5LPwfgP6v/
https://www.instagram.com/p/CA3z8XngDgo/
