Quincy Mason Floyd, një nga djemtë e George Floyd, ka folur për herë të parë për protestat e ngritura në mbarë Amerikën, pasi babai i tij ndërroi jetë për shkak të shoqërimit të dhunshëm nga një efektiv.
Mason mori pjesë në një protestë në Bryan, Texas të dielën, shkruan CNN dhe kishte kohë që nuk e kishte takuar babanë.
“Të gjithë po vijnë dhe po tregojnë dashuri. Zemra ime është prekur vërtet nga e gjithë kjo”, u shpreh ai.
Quincy dhe motra e tij, Connie Mason, vlerësuan protestat paqësore në Bryan dhe u kërkuan protestuesve në të gjithë vendin që të shmangin dhunën.
Protestat e tjera në të gjithë Texas-in ishin më pak të qeta. Në Dallas, 76 persona u arrestuan gjatë protestave të dielën, tha Departamenti i Policisë.
Rreth 45 deri në 60 persona të tjerë do të arrestohen, tha policia.
Ish oficeri i policisë në Minneapolis, Derek Chauvin, i cili u filmua duke vendosur gjurin në qafën e George Floyd duke i marrë frymën deri në vdekje, është planifikuar të paraqitet në gjykatë për një seancë të hënën.
Chauvin, 44 vjeç, u akuzua të premten për vrasje të shkallës së tretë dhe vrasje të shkallës së dytë.
Sipas ligjit të Minesotës, vrasja e shkallës së tretë përkufizohet si shkaktim i vdekjes së një personi “duke kryer një veprim jashtëzakonisht të rrezikshëm për të tjerët”, pa marrë parasysh jetën dhe pa qëllimin për të vrarë.
