Një intervistë kushtuar vetëm saj! Bleona Qerreti ka dashur gjithmonë të jetë në qendër të vëmendjes, por këtë nuk e ka mohuar asnjëherë. Në jetë thotë se i ka arritur vetë gjërat dhe nuk ka shitur kurrë trupin për famë. Të dashurit e saj numërohen me gishtat e orës, ndërsa historia për to shumë shpejt do të jetë e zeza mbi të bardhë, në një libër. “Do të publikoj një libër me të gjitha marrëdhëniet e jetës sime, seksuale, joseksuale, njerëz që më kanë ndihmuar, njerëz që më kanë penguar”, shprehet këngëtarja.
Gjatë intervistës përballë gazetarit Blendi Fevziu, Bleona u pyet se kush e investon për të bërë jetën e saj luksoze. Këngëtarja tregoi se është një firmë, por pa cilësuar emër: “Është një firmë investitorësh që investon ashtu siç do të investonte në çdo brand (markë) tjetër”. Dhe si pritet ta marrin ata mbrapsht frytin e tyre? “Kjo do të ndodhë kur kjo pema jote me shumë degë, të fillojë të funksionojë, të rritet”, tha Bleona.
Pyetjet për jetën privat ajo nuk i anashkalon asnjëherë, është shumë e hapur dhe e sinqertë. Tani ndihet e vetmuar, ndërsa lumturia për të është kthyer në sfida. Pengu i saj më i madh vazhdon të jetë dëshira për të patur një fëmijë. Por babai i fëmijës së saj, duhet që ta stimulojë atë mendërisht.
Je e lumtur?
Është kthyer në sfidë. Nuk do të mbarojë kurrë se do të vijë një tjetër sfidë.
Do të ndërtoni familje?
Brenga është se unë jam si një anije kozmike që është nisur për në hapësirë. Unë e kam kaluar pjesën e vështirë, po e lë Tokën dhe jam në koren e Tokës, ku është turbulenca më e madhe. Dhe kjo turbulencë kaq e madhe është pikërisht momenti në të cilën unë dua një fëmijë. Tani, tani. Mundësisht sot në darkë. Kaq shumë e dua një fëmijë. Por unë nuk mund të bëj kompromise me jetën time. Nuk mund të bëj fëmijë me një person, që nuk e dua, që nuk më stimulon trurin fillimisht. Çfarë do të më thotë mua një mashkull?
Do të thotë që nuk do të dashurohesh kurrë?
Jo, ka njerëz që të stimulojnë trurin fillimisht dhe në momentin që dikush do të jetë aq i zgjuar sa mua të më stimulojë trurin, gjërat e tjera janë… Është më mirë të hash darkë vetëm, se sa të hash darkë me një “loser”.
