Pronari i Kompleksit “Sarajet e Pashait” , Artur Bubeqi, u gjobit me 2 milion lekë nga autoritetet vendase, pasi u procedua për vepra penale “Shpërdorimi i pronës” dhe “Përdorimi i tokës”.
Më herët Bubeqi u justifikua se nuk po dëmtonte mjedisin dhe vijën bregdetare, por po pastronte atë. Madje ai kërkoi edhe ndjesë.
Në një reagim për “Dosja.al”, ai i ka mëshuar sërish faktit se po bënte një punë që në fakt duhet ta bënte bashkia e Himarës.
Ai ka nisur edhe një video ku shfaqet një fadromë që punon në breg të detit, ndërkohë që denoncon se kjo zonë është mbushur me turistë dhe tek një biznes në pronësi të Zamir Manes, ka plazhistë që po bëjnë plazh.
“Ka patur stuhi në mars dhe ka dalë deti deri tek rruga. Poshtë guvave ka rërë. Edhe vitet e tjera kur kam punuar, kështu ka qenë situata. Shikoje videon anash ke rërë cep më cep dhe nuk është rërë po zhavor i imët fare. E imagjinon sesa vapora me rërë do të duhen që të mbushet Drimadha. Bëra një punë që duhet ta bënte bashkia, kur ndërkohë paguaj edhe taksat. E bëra me gjithë shpirt. Po ju nis edhe videon e para 20 minutave në Dhërmi, ku një tjetër biznesi ngjitur me mua, i cili po bën të njejten gjë që bëra unë dje. Sot po dalin edhe njerezit nga deti se nuk lejohen të lahen, ndërkohe te Zamir Mane plazh për të tërë oligarkët.”- u shpreh ai.
