Kryebashkiaku Erion Veliaj foli sot për Këshillin Bashkiak lidhur me projektin e Teatrit të Ri Kombëtar, ku u është përgjigjur edhe pyetjeve të gazetarëve se përse nuk u rikonstruktua teatri dhe përse u shemb natën.
Veliaj u shpreh për ndërtesën tashmë të shembur të Teatrit Kombëtar, se ishte ndërtesë primitive e degraduar dhe se nuk mund të rikonstruktohej kurrë me teknologjinë e sotme.
Sipas kryebashkiakut nuk ekziston më teknologjia e tallashit.
Ai u shpreh se ndërtesa ishte primitive dhe e degraduar dhe nuk mund të rikonstruktohej kurrë me teknologjinë e sotme. Ndërsa, faktit pse u shemb natën, Veliaj tha se ishte e rrezikshme që godina të prishej ditën.
“Me shteresat që kishte pasur ndër vite nuk kishte ku të shkonte më tej, ku të zgjerohej. Nuk ekziston më teknologjia e tallashit, nuk mund të rikonstruktohej me teknologjinë e sotme ajo gjë aq primitive dhe e degraduar.
Edhe nëse do të rindërtohej, do duhen ta hidhnim poshtë ndërtesën dhe ta ndërtonim nga fillimi. Por nuk kishim asnjë gur të fortë, që i kishte bërë ballë kohës, i bie të ruanim copa tallashi dhe fije shkrepëse.
Teatri i ri do ta pasurojë zonën. Godina nuk kishte vlerë, edhe vetë opozita kur ishte në pushtet e nxori të pavlerë.
Fakti që në 70 vite nuk erdhi kurrë një trup e huaj të performojë do të thotë që nuk i përmbante kurrë cilësitë dhe vlerën për të qenë një vend modern”, u përgjigj Veliaj.
E ndërsa pyetjes se përse u shemb Teatri Kombëtar në orët e para të mëngjesit të 17majit kur ende nuk kishte gdhirë, Veliaj u përgjigj se zgjodhën momentin kur nuk kishte rrisk për jetë njerëzish pranë teatrit.
Nëse teatri do të prishej në ndonjë orë tjetër të ditës, do ishte rreziku i lartë se do të kishte njerëz në ambientet e brendshme të tij.
“Konflikti mbi Teatrin eskaloi kur u përfshi politika. Ne gjykuam që do të ishte e rrezikshme për artistët, nëse do të prishej në çdo moment tjetër të ditës.
Unë kam përjetuar 21 janarin, kur Saliu të vriste ditën. Për të respektuar vendimin e shumicës, zgjodhëm momentin kur mund të respektohej me riskun më të vogël.
Kjo është arsyeja që ndërhymë në atë orë dhe më vjen mirë që nuk patëm të lënduar.” – u shpreh Veliaj./gazeta reforma
