Mediat luajnë një rol kyç në kohë pandemie ndaj duhet respektuar liria e tyre dhe duhen mbështetur financiarisht tani që po përballen me vështirësi ekonomike.
Kjo ishte thirrja e përfaqësuesit të OSBE-së për Lirinë e Medias, Harlem Desir me rastin e Ditës Botërore të Lirisë së Shtypit.
Në një kohë që qeveria shqiptare ka lënë pas dore mediat që po përballen me vështirësi të mëdha ekonimike, Desir theksoi se media luan rol kyç në luftën kundër përhapjes së informacioneve të rreme.
Përfaqësuesi i OSBE-së nënvizoi se shëndeti ynë varet jo vetëm nga mundësia për të pasur kujdes mjekësor, por edhe nga mundësia për të pasur informacion të saktë për pandeminë, zhvillimin e saj dhe mënyrat për të mbrojtur veten e të tjerët.
Deklaratës së përsëritur të “kazanit mediatik” të Ramës, Desir iu përgjigj me faktin se thashethemet ndalohen më mirë duke siguruar qasje në burime të shumta dhe të pavarura informimi dhe jo përmes censurës.
“Lërini gazetarët të bëjnë punën e tyre pa pengesa, sigurojuni qasje në informacion dhe mbështetini mediat që janë në vështirësi financiare për shkak të pandemisë. Tani që bota gjendet në mes të një pandemie globale, nevoja për të pasur media të lirë është akoma më jetike dhe vendimtare se kurrë më parë. Vendimtare në kuptimin që na jep informacion të besueshëm për situatën shëndetësore dhe na njeh çdo ditë me vendimet e qeverisë dhe masat shëndetësore. Shëndeti ynë varet jo vetëm nga mundësia për të pasur kujdes mjekësor, por edhe nga mundësia për të pasur informacion të saktë për pandeminë, zhvillimin e saj dhe mënyrat për të mbrojtur veten e të tjerët. Po ashtu, media luan rol kyç në luftën kundër përhapjes së informacioneve të rreme. Megjithatë, kemi parë shumë Shtete t’i përgjigjen kësaj krize me masa që kufizojnë lirinë e medias dhe aftësinë e gazetarëve për të raportuar rreth pandemisë. E kuptoj plotësisht dëshirën e autoriteteve për të luftuar informacionet e pavërteta, si ato për mjekimet e rreme. Megjithatë, kjo nuk mund të arrihet duke kufizuar lirinë e medias. Thashethemet ndalohen më mirë duke siguruar qasje në burime të shumta dhe të pavarura informimi dhe jo përmes censurës. Kemi nevojë për më shumë transparencë, për më shumë përgjegjshmëri, për më shumë gazetarë të lirë për të raportuar, jo për më shumë kufizime”, tha Desir.
Këtë vit, Shqipëria ka zbritur me 2 vende në indeksin e lirive mediatike, sipas raportit të fundit të organizatës ndërkombëtare, “Reporterët Pa Kufij”, duke u renditur në vend të 84-t mes 180 shteteve të botës, një rënie në krahasim me vitin 2019 kur sërish u listua 2 vende më sipër.
Në këtë periudhë krize, qeveria vijon të bëjë një sy qorr dhe një vesh shurdh për mediet, pavarësisht thirrjes së përsëritur të iconstyle.al (lexo këtu), reagimit të Shoqatës së Gazetarëve Europianë, apo Unionit të Gazetarëve, për nevojën e përfshirjes së tyre planin financiar për përballimin e krizës së shkaktuar nga koronavirusi në Shqipëri.
Mediat në Shqipëri aktualisht janë në krizë, disa media audio-vizive dhe online kanë pezulluar përkohësisht pagat e gazetarëve, e të tjera kanë reduktuar pagat e disa punonjësve për të përballluar situatën.
/Report.tv
