Shqiptarët që kanë mbetur të bllokuar në SHBA për shkak të COVID-19, do të kenë mundësi të kthehen në atdhe.
Nëpërmjet një njoftimi zyrtar, ambasadorja shqiptare në SHBA, Floreta Luli-Faber, bën me dija itenerarin që do të ndjekin pasagjerët.
Udhëtarët do të nisen më 29 prill nga aeroporti i New York-ut për të ndaluar në Romë më 30 prill dhe më pas ndalesa e fundit është Shqipëria.
Paketa përfshin udhëtimin nga New York-u drejt Shqipërisë dhe dy javët e qëndrimit në karantinë.
Njoftimi i plotë
Riatdhesimi i qytetarëve shqiptarë që ndodhen në Shtetet e Bashkuara do të ofrohet përmes udhëtimit me itinerarin Nju Jork-Romë-Tiranë. Nisja me datën 29 prill pasdreke nga Aeroporti JFK nëpërmjet kompanisë Alitalia (fluturim komercial) që mbërrin në Romë më datë 30 Prill. Fluturimi tjetër drejt Tiranës përmes Air Albania (fluturim riatdhesimi) arrin në Tiranë po me datën 30 prill në darkë dhe prej andej udhëtarët do të drejtohen menjëherë drejt hoteleve ku do kryhet karantina. Duke marrë shkas nga informacionet tuaja mbi vështirësinë e prenotimit të biletave, si edhe për ta bërë sa më të lehtë procesin e riatdhesimit që ka marrë përsipër Qeveria Shqiptare, Ministria e Energjisë dhe Infrastrukturës dhe Ambasada e Republikës së Shqipërisë në Uashington DC, kanë punuar intensivisht për të bërë të mundur ofrimin e këtij udhëtimi përmes një operatori dhe në një paketë të vetme. Kjo paketë do të përfshijë udhëtimin nga Nju Jorku drejt Shqipërisë, përfshirë dy javët e qëndrimit në karantinë. Shumë nga ju do duhet të kenë nëvojë që të presin dhe biletat e brendshme në USA për të arritur në aeroportin JFK në kohën e duhur. Për të bërë pronotimet, ju lutem komunikoni sa më parë me:
Email : info@globustravelusa.com
Mob : ( 551 ) 265 6279
Mob : ( 914 ) 400-9602
Numri i vendeve është i limituar, prandaj ju lutem shpejtoni!
Ju urojmë udhëtim të mbarë!
Kujtojmë këtu se një ditë më parë erdhën 126 shtetas nga Brukseli, ndërkohë sot pritet të mbërrijë avioni i parë nga Viena./gazetareforma
