Ka nisur sot shembja e gjimnazit “Sami Frashëri” në kryeqytet, për t’u rindërtuar sërish pas dëmeve të shkaktuara nga tërmeti i fuqishëm e 26 nëntorit.
Godina e cila u ndërtua në vitet ’60, nuk i mbijetoi dot lëkundjeve të mëdha të tërmetit dhe pas vlerësimit të ekspertëve u vendos që shkolla të shembej.
Kryebashkiaku Erion Veliaj tha sot gjatë inspektimit se shkolla, ku edhe ai ka studiuar do të shembet për t’u ndërtuar më e madhe dhe më e fortë. Veliaj u shpreh se në shtatorin e ri do të kemi shkollën më të bukur.
“Sami Frashëri” pritet që të jetë një prej shkollave që do të përfitojnë nga grantet e qeverisë të fituara në Bruksel gjatë Konferencës së Donatorëve, 1.15 miliardë euro.
“Shkolla “Sami Frashëri” do të shtrihet plotësisht në territorin ku ndodhet sot godina, por ne synojmë që të jetë 20 – 30% më e madhe. Që nga momenti i projektimit do të jetë me klasa të qëndrueshme, me ndriçim ta mirë, plotësisht e termoizoluar. Shtimi i hapësirave për aktivitete komunitare është pjesë e projektimit, jo vetëm ambiente sportive, por edhe të tjera që të mund të përdoren nga komuniteti”, është shprehur më herët Arbjan Mazniku, nënkryetar i bashkisë së Tiranës.
