Plazhi në verën e 2020 do të bëhet brenda kupolave me dru bambuje dhe me hapësirë për dy shtretër dhe me dush me ujë të kripur.
Ky është projekti më i ri që na vjen nga Roma, Itali, aty ku tashmë kanë nisur projektet për sezonin turistik të 2020-s.
Sipas “IlMesaggero”, këto kupola kanë një diametër prej katër metrash dhe një kosto prej rreth 500 eurosh.
Ato mund të ripaketohen në gjysmë ore dhe pasi të çmontohen, mund të vendosen në kuti gjysmë metri katror. Inspirimi vjen nga tendat fushore që përdoren në Mongoli.
Ky është projekti i dytë që bëhet publik, pasi atij nga një kompani në Modena, në Itali e cila ka projektuar ndarje mes çadrave me mure Plexiglas-i dhe profile alumini 4,5 metra dhe dy metra të larta.
Këto projekte pritet të frymëzojnë edhe ato për sezonin turistik në Shqipëri, për të cilin, ministri i Turizmit dhe Mjedisit Blendi Klosi, u shpreh se do të respektohen rregullat e higjienës dhe të distancimit social.
Klosi tregoi pak ditë më parë se po punohet me ekspertët për planin konkret ku do të ketë distancë mes çadrave, por nuk tha detaje pasi gjithçka pritet të vendoset deri në momentin kur mund të mendohet hapja e aktivitetit turistik.
“Nëse do ketë plazh, aktivitetet në det, strukturat që do realizojnë aktivitetin në plazh do marrin leje. Askush nuk di asgjë deri më tani. Do kemi rregulla. Varianti i italianëve me hapësirat e ndara me plastmas është kreativ, por nuk besoj të jetë ashtu tek ne”.
