Në mesin e njerëzve që vraponin për të shpëtuar jetën nga sulmi terrorist mbrëmjen e djeshme në Nisë të Francës, ka pasur edhe shqiptarë. Në një video e cila po qarkullon në rrjetet sociale dëgjohet një vajzë që thërret një tjetër me emrin Alma dhe më pas bërtet: hajde hajde.
Duket se vajzat shqiptare nuk janë lënduar dhe kanë shpëtuar për mrekulli nga ky sulm. Videoja është xhiruar nga Nerajda Rama nga Vlora, e cila jeton në Francë dhe ka qenë e pranishme në momentin kur kamioni ka hyrë mes turmës. Vajza thotë në një video se agresori donte t’i vriste të gjithë.
Po Nerjada nuk ka qenë e vetjma shqiptare e pranishme në momentin e sulmit terrorist. Liljana Berberi, e cila ka 3 vjet që jeton në këtë vend, ka qenë shumë pranë sulmit dhe ka rrëfyer atë çfarë ka parë dhe ka përjetuar së bashku me familjen e saj.
Në një lidhje telefonike për “Top Channel”, Berberi është shprehur: “Situata në Nisë është shumë, shumë e keqe. Ishim bashkë me burrin tim dhe me miqtë tanë të dashur nga Strasburgu duke i parë fishekzjarrët. Po kalonim shumë, shumë bukur. Në momentin sa mbaruan fishekzjarrët, bëmë 50 metra duke dëgjuar muzikë e duke kërcyer të katërt dhe në atë moment burri im shikon një makinë policie edhe thotë ‘çfarë kanë këta policët që bëjnë kështu në mes të njerëzve me makinë?’ dhe në të njëjtën kohë i them që janë me antiplumb që po vrapojnë, diçka po ndodhë”.
“Në vendin që ne ishim, dëgjuam të shtëna automatiku dhe nuk dinim nga të iknim, zbritëm poshtë te plazhi, njerëzit vraponin nga të gjitha anët, gra shtatzënë, fëmijë, trupa të prerë, zorrët jashtë. Kamioni ishte nga ata 18 tonësh dhe i mori të gjithë, të rinjtë me motor, skena lufte. Kisha mikeshën shtatzënë 5-muajshe dhe nuk dinim nga të shkonim”.
