Pacienti 61-vjeçar që u raportua se ka pësuar vdekje klinike në spitalin e Infektivit, si pasojë e koronavirusit, është një emër i njohur për botën e sportit në Shqipëri.
Bëhet fjalë për ish-trajnerin e Kombëtares së boksit, Skënder Kurti, i cili është ne gjendje tepër të rëndë.
Fillimisht u raportua se Kurti ishte viktima e 5-të nga Koronavirusi, ndërkohë së fundmi Ministria e Shëndetësisë raporton se ai ka pësuar vdekje klinike dhe mbahet me aparatura nga mjekët.
Kurti ka qënë gjithashtu boksier kampion me ekipin e Tiranës, dhe ka 30 vjet në profesionin e trajnerit të boksit.
Ai vuan nga probleme të zemrës dhe nga java e parë e muajit mars ishte kthyer nga jashtë shtetit.
Në një njoftim për shtypin, mjeku Pëllumb Pipero thotë se Kurti është rikthyer në jetë pas komplikacioneve, por gjendja e tij është e rëndë pavarësisht përpjekjeve të personelit shëndetësor.
“Kemi raste të rënda dhe kemi raste shumë të rënda sikundër janë pacientët e shtruar në repartin e terapisë intensive, midis të cilëve njëri nga rastet sot në mëngjes ka bërë vdekje klinike, vdekje që zgjati relativisht gjatë por pa e humbur shpresën e personelit shëndetësor, të mjekëve reanimator për ta rikthyer atë në jetë. Fatmirësisht u rikthye në jetë por vazhdon të jetë ende rëndë”, deklaroi Pipero.
Deri më tani janë shënuar 4 viktima në vend nga koronavirusi dhe numri i të infektuarve në vend është 89, ndërsa nga çasti në çast pritet të dalë ministria për të përditësuar informacionet.
/Iconstyle.al
