Një ditë pasi këngëtari Muhamet Sejdiu u konfirmua pozitiv me Koronavirus, një tjetër koleg i tij që ka qenë në kontakt me të është vetëizoluar.
Bëhet fjalë për këngëtarin Shkëlzen Jetishi, i njohur ndryshe si Xeni, i cili para disa ditësh ishte në një ditëlindje në Gjilan, ku këndoi miku i tij.
Xeni ka konfirmuar për “Magazina.al,” se ka disa ditë që është vetizoluar dhe po qëndron në shtëpi.
“Po unë jam izoluar pasi kam qenë në atë ditëlindje, nuk kam ndonjë shqetësim shëndetësor. Kam bërë kontrolle tek mjeku dhe jam mirë, më kanë kontaktuar edhe nga Ministria e Shëndetësisë. Po qëndroj brenda me familjen time”, ka thënë Xeni.
Kujtojmë se gjatë ditës së sotme, është vetizoluar edhe Kryetari i Komunës së Gjilanit, Lutfi Haziri, i cili po ashtu ishte në atë festë ditëlindjeje.
Këngëtari Muhamed Sejdiu dhe bashkëshortja e tij janë diagnostifikuar me virusin pas mbërritjes së tyre nga Gjermania.
Këtët e ka konfirmuar vetë këngëtari, por edhe Instituti Kombëtar i Shëndetësisë Publike në Kosovë, i cili ka dhënë edhe detaje për të infektuarit.
“Nga data 08.02.2020 deri më 17.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 284 mostra të dyshimta në virusin SARS-CoV-2 dhe gjithsej nëntëmbëdhjetë prej tyre kanë rezultuar pozitive. Sot më 17.03.2020 janë konfirmuar edhe dy raste pozitive për virusin SARS-CoV-2: Rastet janë nga komuna e Gjakovës, të kthyer nga Dusseldorfi i Gjermanisë, njëri i gjinisë mashkull 54 vjeç dhe tjetri i gjinisë femër 49 vjeç”, thuhet në njoftimin e IKSHP-së.
