Virusi vdekjeprurës Covid-19 i përhapur në të gjithë botën ka ngritur alarmin edhe në Shqipëri.
Deri tani janë konfirmuar 55 raste të infektuara dhe një vdekje në qytetin e Durrësit, ndërsa shifrat parashikohet të vijnë në rritje gjatë ditëve në vijim.
Për këtë arsye, qeveria ka marrë masat e nevojshme për të parandaluar përhapjen e epidemisë.
Janë mbyllur shkollat, kufinjtë dhe çdo aktivitet publik. Është ndaluar qarkullimi i automjeteve, janë pezulluar fluturimet dhe është mbyllur çdo biznes.
Çdokush është i detyruar të izolohet në shtëpi dhe personat që thyejnë rregullat pa kriter, ndëshkohen nga policia e shtetit.
Le të qëndrojmë tek mbyllja e shkollave.
Çdo nxënës, nga klasa e parë deri në vitin e tretë të gjimnazit, po zhvillon mësimin nëpërmjet televizorit.
Siç njoftoi edhe Ministra e Arsimit, Besa Shahini, nxënësit do të operojnë përmes televizionit RTSH dhe aplikacionit Whatsapp për të zhvilluar leksionet e tyre.
Për të kuptuar më shumë si po zhvillohet mësimi online, “Iconstyle.al” ka realizuar një intervistë me nxënësin e klasës së shtatë, Rein dhe nxënësen e vitit të tretë në gjimnaz, Enin.
Rei ka shpjeguar si po zhvillohet mësimi për 9-vjeçaret dhe si po komunikojnë me njëri-tjetrin.
“Që prej mbylljes së shkollave, mësimin po e zhvillojmë në RTSH. Oraret publikohen nga Ministrja në profilet e saj në Facebook ose Instagram.
Çdo vit ka një orar të caktuar që na tregohet nga mësueset nëpër grupet në Whatsapp.
Pasi shohim leksionin në TV, në grupin e Whatsapp-it marrim detyrat për mësimin. Përgjigjet e detyrave ia dërgojmë me foto mësueses, e cila na jep edhe vlerësimin.
Orët e mësimit bëhen të shkurtuara dhe për çdo paqartësi që kemi, pyesim mësuesen në Whatsapp.”
I pyetur nëse është funksionale kjo mënyrë e zhvillimit të mësimit dhe nëse kanë probleme, 13-vjeçari tregon:
“Është mirë sepse nuk mbesim mbrapa, por mësimet kuptohen më mirë me mësuesen në klasë. Ndonjëherë na humbet vëmendja nga mësimi dhe nisim bisedat me shokët dhe shoqet në Whatsapp. Mësueset na qortojnë me mesazhe, por nuk është njësoj si në klasë.”
18-vjeçarja, Eni, rrëfen se përveç komunikimit në Whatsapp, gjimnazistët operojnë edhe me aplikacionin “Classroom”.
“Përveç grupeve në Whatsapp, ne përdorim edhe “Classroom”, ku dërgojmë foto të ushtrimeve dhe detyrave për secilin vit dhe secilën lëndë. Ky program është efikas, megjithatë grupet në Whatsapp janë më të lehta për përdorim.
Po ashtu, edhe oraret e mësimit na komunikohen nga mësueset e çdo lënde në grupet e klasave në Whatsapp. Secila lëndë ka një grup.
Për maturantët që do të zhvillojnë provimet e lirimit, Ministrja Shahini dhe mësuesit na kanë sugjeruar të punojmë me dy libra që janë përmbledhje e testeve të bëra gjatë viteve 2011-2019. Nuk e dimë nëse rezultati i maturantëve të këtij viti do të jetë i njëjtë me atë të maturantëve të viteve të kaluara.”
Mbetet ende për t’u parë sa do të zgjasë karantina e cila ka detyruar jo vetëm nxënësit, por edhe një pjesë të madhe të të rriturve që t’i zhvillojnë punët e tyre nga shtëpia./ Iconstyle.al
