Mësimi përmes televizorit dhe përmes leksioneve në faqet zyrtare të ministrisë në YouTube ka qenë mënyra e vetme për nxënësit dhe maturantët për të mos mbetur mbrapa tani që institucionet arsimore janë mbyllur deri më 23 mars.
Në komunikimin e saj nëpërmjet video-mesazheve në rrjete sociale Ministrja Besa Shahini u është përgjigjur pyetjeve nga vetë nxënësit apo prindërit e interesuar.
Pyetjes së ngritur “A do të shtyhet testimi i maturës?”, Ministrja Shahini iu përgjigj duke thënë se deri tani nuk ka asnjë arsye të ndodhë:
“Për momentin, nuk kemi asnjë arsye të mendojmë pse duhet të shtyhet. Unë besoj fuqishëm që këto 2 javë, përderisa jemi detyruar të qëndrojmë në shtëpi, është një periudhë shumë e mirë për të përsëritur të gjitha leksionet dhe për të mësuar në mënyrë që të jemi sa më të përgatitur për testin e maturës. Në mënyrë që t’ju vijmë në ndihmë, kemi kërkuar nga RTSH që të na japë edhe një orar shtesë vetëm për maturantët. Dhe ky orar është ora 13:30-14:30, ku do të transmetojmë leksione të klasës së 12-të të matematikës, biologjisë dhe kimisë, në mënyrë që maturantët të kenë mundësi të thellojnë më tutje aftësitë e tyre në këto 3 lëndë, të cilat konsiderohen edhe si më të vështirat nga vetë ata. Mos harroni, nga ora 13:30-14:30, nga e hëna deri të premten, është edhe një orar shtesë për të gjithë maturantët në mënyrë që të arrijnë të përsërisin disa nga leksionet e klasës së 12-të”.
Ndërkohë, pyetjes “A do të vazhdojë nisma e leksioneve mësimore në RTSH edhe përtej datës 23 mars?”, ministrja Shahini iu përgjigj kështu:
“Patjetër. Jemi në diskutim me RTSH për mënyrën më të mirë për të vazhduar përtej datës 23 mars. Pra, përtej këtyre 2 orareve që na i ka dhënë RTSH në dispozicion për të transmetuar leksione dhe përtej leksioneve të lëndëve të caktuara, ideja është që të bëjmë shumë më shumë dhe të kemi edhe programe të tjera që janë edhe argëtuese, edhe edhe edukative”, nënvizoi ajo ndërsa në ditët në vijim do të njoftojë edhe për marrëveshjen finale me RTSH për detajet e programit që do të vijojë përtej kësaj periudhe të jashtëzakonshme.
