Ministria e Shëndetësisë ka konfirmuar se numri i personave të infektuar me Koronavirus në Shqipëri ka shkuar në 10.
Në një njoftim për shtypin, zëvendësministrja e Shëndetësisë, Mira Rakacolli njoftoi se janë analizuar 114 raste dhe nga këto kanë rezultuar pozitivë 10 persona.
Rakacolli u shpreh se njëri nga të infektuarit ndodhet në spitalin e Durrësit, ndërsa theksoi se 6 nga të infektuarit kanë lidhje me dy rastet e para atë e bir.
“Janë testuar 114 rate të dyshuar, 10 prej të cilëve janë pozitivë. Dy të cilët ishin rastet e para nga dje, 6 në kontakt me dy të sëmurët dhe dy raste të reja që nuk kanë lidhje me ta. Njëri ka një histori udhëtimi njëditor në Milano dhe tjetri ndodhet në spitalin e Durrësit”.
Rakacolli bëri thirrje që të shmangim daljet nga shtëpia, kafenetë, restorantet.
Shefi i urgjencës, Skënder Brataj: Do të ketë shtim të rasteve
Shefi i urgjencës, Skënder Brataj ka bërë me dije se jemi në fillimin e një epidemie dhe se do të ketë shtime të rasteve të infektuara me Koronavirus në Shqipëri. Ai u shpreh se në numrin 127 janë trefishuar telefonatat nga personat që dyshojnë se mund të jenë bartës të virusit.
“Është trefishuar numri në 127, 80% e njerëzve që nuk shfaqin simptoma. Ato që shfaqin simptoma kurohen në shtëpi në 90% të rasteve. Kemi pasur raste të gripit. Si mund t’i përgjigjemi këtij rasti? Ka një shpërndarje të shpejtë? Po, ka. Duhet të rrimë në shtëpi. Duhet të jemi të ndërgjegjshëm të rrimë në shtëpi, i mori masat edhe Italia, filloi izolimi. Nuk ka rrugë tjetër. Ju lutem qytetarëve që të izolojnë daljet, distancat me një metër nga njëri-tjetrin, duhet shumë bashkëpunim”.
Brataj theksoi që janë marrë masa për dezinfektimin e ambienteve publike veçanërisht shkollat dhe kopshtet.
“Ka më shumë se një muaj që shkollat janë furnizuar nga Bashkia me detergjent dhe klor pluhur, kryesisht lënë dhe pothuajse çdo ditë është klorifikimi brenda ambienteve dhe sidomos tualetet. Ndërkohë që masat e higjienës janë vënë re edhe në qytet duke filluar nga pastrimi dhe dezinfektmi i kazanëve, mbetjeve dhe pusetave. Një problem janë maskat mbrojtëse të cilat mungojnë në disa farmaci të qytetit”, bëri me dije Brataj.
Albana Fico, Drejtore e Institutit të Shëndetit Publik tha se në këtë institut janë të gjitha kapacitetet për të përballuar situatën e Koronavirusit. Ajo bëri një apel të përsëritur për masat e higjienës personale.
