Një tjetër person dyshohet se është prekur nga Koronavirusi në Shqipëri krahas dy të tjerëve që u konfirmuan mbrëmë, njofton “ABCNwes”.
Personi ka mbërritur tashmë te Infektivi me autoambulancë, ku do të verifikohet nëse mbart virusin COVID-19.
“Burime nga spitali më bëjnë me dije se ka simptoma të COVID-19, por janë analizat e specializuara që do të saktësojnë nëse kemi të bëjmë vërtetë me një të prekur të tretë”, raporton “ABCNews”.
Deri më tani dihet se dy personat e infektuar jetojnë në rrugën “Irfan Tomini” në Tiranë dhe janë babë e bir. Ata kanë hyrë në Shqipëri më datë 26 shkurt nga pika e Hanit të Hotit dhe ka qenë djali ai i cili mbartte virusin i pari.
Që nga ajo ditë, ata kanë patur kontakte të vazhdueshme me qytetarë të tjerë. ISHP njoftoi më parë se janë duke kontaktuar me personat të cilët mund të kenë pasur kontakt me dy personat e infektuar për të parë nëse ka apo jo shenja te ata.
Ministrja e Shëndetësisë konfirmoi se gjatë kësaj kohe është bërë identifikimi, izolimi, dhe janë marrë mostrat e kontakteve të ngushta të dy të infektuarve, të cilët gjithashtu janë izoluar.
“Dje janë konfirmuar dy rastet e para në Shqipëri. Bëhet fjalë për 28 dhe një 54-vjeçar banues në Tiranë. Një rast ka ardhur në datë 26 shkurt nga Hani i Hotit. Babai është infektuar si kontakt i ngushtë. I janë marrë mostrat dhe kanë rezultuar pozitivë. Menjëherë është bërë identifikimi, izolimi, kanë marrë mostrat e kontakteve të ngushta të cilët janë izoluar.
Babë e bir po marrin shërbim te Infektivi. Mjekët dhe infermierët janë në ballë të kësaj situate për çdo skenar që ne e kemi planifikuar. Kam një thirrje për ata që kontaktohen të bashkëpunojnë për të mirën e tyre dhe të mirën e të afërmve të tyre. Mjekët janë në krye të detyrës ku çdo orë ka përforcim të masave”, u shpreh Manastirliu.
