Me rastin e 100-vjetorit të Tiranës si kryeqytet, parku “Rinia” do të kthehet në kartolinën e qytetit.
Kryebashkiaku Erion Veliaj ka njoftuar përmes një postimi në Facebook, se ekipi po mbyll detajet e fundit të transformimit të parkut, ku do të ketë hapësira për fëmijët, të moshuarit dhe katërputroshët.
“Tirana ka hyrë në shekullin e dytë të saj dhe parku “Rinia” është bizhuja për këtë ? vjetor. Ekipi po mbyll edhe detajet e fundit të transformimit të parkut, me hapësira për fëmijët, gjyshet e gjyshërit. ???
Mezi pres ta çelim para 1 qershorit, si dhuratë për fëmijët e shkëlqyer të qytetit. ???”, shkruan Veliaj.
Për herë të parë, parku “Rinia” do të ketë edhe një hapësirë kushtuar kafshëve, duke ofruar edhe më shumë siguri për frekuentuesit e tjerë të këtij parku.
“Për ata që janë kafshëdashës, për katërputroshët kemi një hapësirë të veçantë, një kënd lodrash për kafshët shtëpiake, i pari në Shqipëri. Kemi respektuar hapësirën; pra, ata që janë mësuar me kafshët, kanë hapësirën e tyre, por për të gjithë ata të tjerët që kanë një 4-putrosh në shtëpi dhe duan një hapësirë argëtuese, për herë të parë sjellim një risi të kësaj natyre”, nënvizoi Veliaj.
Parku “Rinia” ka tashmë edhe një reliev të ndryshëm në sipërfaqe të caktuara, çka do të nxisë edhe një aktivitet më fizik dhe intensiv për fëmijët.
