Punonjësit në Shqipëri janë të stresuar dhe kjo ndikon negativisht në cilësinë e jetës së tyre.
Sipas një studimi të realizuar në Tiranë, ku u përfshinë 800 persona të punësuar, një pjesë e konsiderueshme e punonjësve (48.5 %) përjetonin stres të nivelit të moderuar dhe 12.4% e punonjësve përjetonin stres të nivelit problematik.
Studimi tregoi gjithashtu se femrat (51.5%) janë më të prirura se meshkujt (43.3%) për të përjetuar stres të nivelit të moderuar, por nuk kanë diferencë me ta në përjetimin e stresit të nivelit problematik (femrat 12.4%, meshkujt 12.6%).
Kjo pasi femrat janë më të ekspozuara se meshkujt ndaj disa faktorëve stresues siç janë rolet e shumëfishta, pengesat për një karrierë normale dhe diskriminimi.
Po cilat janë faktorët që ndikojnë në rritjen e nivelit të stresit?
Gjetjet e studimit sugjerojnë gjithashtu se faktorët si presioni i kohës; paqartësia e rolit; konflikti i rolit; mungesa e promovimit; vështirësia në delegimin e punëve; puna jo e mirë në grup; mungesa e pjesëmarrjes në vendimmarrje; trajtimi i pabarabartë në punë; angazhimi në detyra të vështira; dhe niveli ulët i pagës, ndikojnë në rritjen e nivelit të stresit tek punonjësit.
/Monitor
