Ka shkuar në pesë numri i të dyshuarve për Koronavirus në Shqipëri, të cilët u janë nënshtruar kontrolleve mjekësore.
Pesë personat ishin kthyer nga Kina pak ditë më parë, por nga kontrolli kanë rezultuar negativ për virusin.
Konfirmimi vjen nga shefja e Shërbimit Infektiv në Qendrën Spitalore “Nënë Tereza” në Tiranë Najada Çomo, gjatë mbledhjes së tretë publike të Task-Forcës se specialistëve.
Ajo u shpreh se “janë menaxhuar me sukses pesë raste të dyshuara që kanë pasur një histori udhëtimi në Kinë, nga të cilat dy kanë rezultuar grip dhe asnjëri nuk ka patur koronavirus”.
Tashmë nga java e dytë e shkurtit, diagnoza për Koronavirusin kinez mundësohet në laboratorin e virologjisë në Institutin e Shëndetit Publik.
Në pikat kufitare detare, ajrore dhe tokësore sipas Ministrisë së Shëndetësisë janë kontrolluar mbi 100 shtetas shqiptarë dhe të huaj që kanë udhëtuar nga Kina drejt vendit tonë dhe nuk janë konstatuar probleme shëndetësore në lidhje Koronavirusin e ri.
Në një komunikim për “iconstyle.al” shefja e infektivit, Najada Çomo u shpreh se shqiptarët duhet të rrinë të qetë, pasi vendi ynë futet në listën e atyre vendeve me rrezikshmëri të ulët për përhapjen e Koronavirusit.
