AKU ka reaguar pas tragjedisë në Berat dy ditë më parë, ku dy binjakë humbën jetën në rrethana misterioze.
Prindërit treguan se ata i ushqenin fëmijët me qumësht pluhur të marrë nga një shoqatë e paverifikuar dhe dyshojnë se ai është shkaku i helmimit. Eduart dhe Merushe Agalliu treguan për “Top Channel” se mëngjesi i 27 janarit ishte si çdo mëngjes tjetër.
Pasi i kishin ushqyer fëmijët me qumësht kutie siç bënin gjithmonë, i kishin vendosur në krevatin e tyre për të fjetur, por fatkeqësisht pas 20 minutash i kishin gjetur pa jetë.
Në një njoftim zyrtar, AKU njofton se janë marrë mostra për analizim të produktit qumësht pluhur për bebe. Gjithashtu do të kryhen analiza ndaj ujit të përdorur për tretjen e qumështit.
Mjekësia ligjore nuk ka dhënë ende rezultatin e ekspertizës për helmimin e foshnjave.
Reagimi i plotë i AKU-së
AKU, në bashkëpunim me organet e drejtësisë dhe shëndetësisë, merr masa të menjëhershme për verifikimin e dyshimit mbi helmimin e foshnjave në Qarkun e Beratit. Autoriteti Kombëtar i Ushqimit, referuar rastit mbi dyshimin e helmimit nga qumështi pluhur për bebe, të dy foshnjave në qarkun e Beratit, informon se ka marrë masa të menjëhershme në bashkëpunim me organet e drejtësisë dhe institucionet e shëndetësisë, megjithëse nuk ka dalë ende ekspertiza mjeko- ligjore. Janë marrë mostra për analizim të produktit “qumësht pluhur për bebe”, duke përfshirë edhe analizimin e ujit që është përdorur për tretje e produktit, apo edhe rrethana të tjera që organet kompetente po hetojnë.
AKU siguron konsumatorin se produktet e kësaj kategorie në treg kontrollohen dhe janë produkte që vijnë të certifikuara nga vendet e BE-së, sigurisht që ndiqen nga Operatorët e Biznesit Ushqimor nën përgjegjësinë kryesore të tyre, edhe nën monitorimin e rreptë të Autoritetit Kombëtar të Ushqimit. Gjithashtu, ju bëjmë me dije se, referuar sistemit RASFF (Sistemi i Informimit të Shpejtë për Ushqimin dhe Ushqimin për Kafshë) i krijuar nga BE, pas verifikimeve rezultoi se nuk ka pasur asnjë njoftim të kategorisë “Alert” për këto lloj produktesh. AKU, në kuadër të garantimit të sigurisë ushqimore për konsumatorin, ka marrë të gjitha masat e nevojshme për verifikim dhe gjurmimin e rastit, edhe pse ende nuk është shprehur Mjekësia Ligjore.
