Tërmeti i datës 26 nëntor 2019 me magnitudë 6.4, që shkaktoi 51 viktima, u ndje 9 ballë në fshatrat Hamallaj, Jube dhe Rrushkull.
Sipas të dhënave zyrtare të IGJEUM, tërmeti është ndjerë:
– 8 ballë në qytetin e Shijakut, Golemit, Vorës, Thumanë, Mamuras etj,
-7 ballë në qytetin e Tiranës, Rrogozhinë, Milot, Velipojë etj;
-6 ballë në qytetet e Shkodrës, Pukës, Bulqizës, Librazhdit, Fierit;
-5 ballë në qytetet e Tepelenës, Korçës, Tetovës dhe Niksicit, Prishtinës, Dubrovnikut, Korfuzit, Leces, Otrantos;
-4 ballë në qytetet e Janinës, Preveza, Nish, Sarajeve, Taranto.
Ndryshe nga magnituda, shkalla evropiane makroseismike EMS-98 mat forcën e tërmetit me ballë, raporton “Shqiptarja”.
Intensiteti EMS-98 me ballë tregon se sa fuqishëm ndikon një tërmet në një vend të veçantë. Shkalla e EMS-98 me ballë ka 12 kategori ku shkalla 9 ballë është shkatërruese, dhe pastaj vijnë tre shkallët e tjera deri tek 12-ta që janë shumë shkatërruese.
Nga tërmeti humbën jetën 51 persona; përkatësisht në Durrës 25 viktima, Thumanë 24 viktima, Lezhë 1 viktimë dhe Tiranë 1 viktimë.
