Mbrëmja e maturës nisi ndryshe dhe me lot në shkollën e mesme të Kukësit, “Havzi Nela”. Festës i mungonte 17-vjeçarja Erlinda Asllanaj, e cila u nda nga jeta vetëm pak ditë më parë, teksa lahej në ujërat e liqenit të Fierzës u mbyt në mënyrë aksidentale.
Por e ndjera nuk mungoi në këtë ditë, pasi bashkëmoshatarët ishin kudo të pranishëm me imazhin e Erlindës. Nxënësit e klasës së saj shkuan në mbrëmje të veshur me të zeza dhe duke mbajtur në duart e tyre foton e shoqes së tyre që në mënyrë tragjike u largua nga jeta.
Në fotot e publikuara në faqen zyrtare në “Facebook” të shkollës, emri i vajzës është gdhendur në një targë automjeti, ndërkohë që imazhi i saj është mbajtur nga shumë shoqe e shokë në duar.
Bashkëmoshatarët kanë dashur të ndjejnë prezencën e Erlindës në këtë ditë që do të ishte mjaft domethënëse për të, të cilëve u janë bashkangjitur edhe maturantët e tjerë.
*Shfleto galerinë
