Në një intervistë për “Tv Klan”, aktori Bes Kallaku, i cili i është gjendur pranë banorëve të vendit të tij, Bubqit, ka treguar sa shumë është prekur nga kjo situatë.
Besi është shprehur se po mundohet të bëjë aq sa mundet për t’i ardhur në ndihmë të prekurve nga tërmeti, madje do të hapë një numër llogarie për fshatin e tij.
Për më tepër, aktori premtoi se të gjitha fitimet nga biletat e filmit të tij “Falco” do të shkojnë për familjet e prekura.
“Unë nga sot do të hap një numër llogarie për fshatin Bubq ku çdo e ardhur që do futet dhe do jetë pjesë e kësaj llogarie do të shpërndahet për banorët e fshatit. Dashtë Zotit na gjenden afër miq, shokë, dashamirës dhe ata që janë biznesmenë që janë jashtë sepse me gjithë respektin dhe mundin që po bëhet kam përshtypjen se është një numër i madh dhe derisa të vijë radha e Bubqit këta të shkretët që janë jashtë do vazhdojnë të jenë jashtë në qiell të hapur. Do përpiqem që t’i ndihmoj si bir i këtij vendi me aq sa kam mundësi. Të parët që do bëjmë donacionin kryesor jam unë me Xhensilën që do bëjmë një donacion prej 5 milion lekësh të vjetra dhe të gjitha fitimet e biletave nga filmi Falco që do jenë për të gjithë javën do futen atje”, u shpreh Besi.
