Të gjithë studentët që kanë humbur familjarët si pasojë e tërmetit në Durrës, Tiranë dhe Lezhë do të përfitojnë bursë në masën 15 mijë lekëve në muaj.
Vendimi i marrë nga qeveria vjen në kuadër të paketave të ndihmës për familjet e prekura nga tërmeti i nëntorit.
Në vendimin e botuar në Fletoren Zyrtare thuhet që kjo bursë do të jepet për studentët që ndjekin arsimin e lartë në institucionet publike vetëm për vitin akademik 2019-2020 dhe qe kanë humbur persona të afërm në tërmetin e nëntorit.
Në këtë rast ata do të përfitojnë 5 mijë lekë më tepër se të rinjtë e tjerë që ndjekin studimet e larta.
Do të jenë universitetet ato që do të identifikojnë studentët dhe do të dërgojnë listat për miratim në ministrinë përgjegjëse për arsimin.
