Ditën e djeshme në media u përhap një lajm ku thuhej se kampi Al Hol është marrë nën kontrollin e ISIS.
Sigurisht që lajmi na preku shumë dhe të gjithë u shqetësuam për fatin e Alvin Berishës, 11-vjeçarit shqiptar që ndodhet në këtë kamp.
Por gazetari i La Iene, Taulant Kopliku në një reagim të bërë së fundmi në Facebook ka dhënë lajmin e mirë.
Ai thotë se Alvini i vogël ndodhet shëndoshë e mirë, nën kujdesin e organizatës, Save the Children.
“Ka që dje që qarkullon në mediat shqiptare ky lajm. Normal është shqetësues dhe merr vëmendjen e duhur nga opinioni i një vendi qe ka shtetasit e tij (fëmijët) atje.
Por fatmirësisht brenda lajmit të keq ka edhe lajme të mira. Në të vertete ka patur perplasje të vazhdueshme në kamp dhe kjo ka ndodhur edhe para ndërhyrjes turke. Djegia e çadrave, vrasjet me armë të ftohta apo dhuna mes grupeve dhe etnive kanë qene prezente rregullisht në kamp. Kjo nuk do të thote se ISIS mori kontrollin e Al Hol.
Për të hyrë në temë. Sapo u informova nga Ada, vullnetarja e Save The Children në kamp. Edhe sot ajo e ka kontaktuar Alvinin i cili është nën kujdesin e kesaj organizate. Në sektorin ku ndodhet i vogli, nuk ka as më të voglin problem nga ata që po shkruhen në media. Kam bindjen se shumë shpejt do kemi lajme të mira. #AlvinNëShtëpi”,- shkruan gazetari.
