Kate Middleton është një nënë si gjithë të tjerat!
Dukesha e Kembrixhit la pa fjalë blerësit në një supermarket të enjten në Sainsbury, Norfolk, Angli, kur u shfaq me dy fëmijët e saj më të rritur në krah.
Kate po ndihmonte Princin Xhorxh, 6 vjeç dhe Princeshën Charlotte, 4 vjeç, të zgjidhnin kostumet e Halloween-it.
“Ishte bukur të shikoje që ajo ishte thjesht një nënë normale që bënte pazar për fëmijët e saj”, tha një blerës që dalloi Dukeshën, sipas “The Sun”. “Më pëlqen shumë se si ajo thjesht vijon jetën e saj normale, dhe është me këmbë në tokë”, vijoi ai.
Nëna e tre fëmijëve është vërejtur shpesh herë në Norfolk, gjatë vizitave të familjes në Anmer Hall. Shtëpia me 10 dhoma gjumi që kanë atje ishte një dhuratë martese nga Mbretëresha Elizabeth.
Sipas raportimeve, familja mbretërore po planifikon të kalojë pushimet e Halloween-it duke gdhendur kunguj dhe duke përgatitur kekë të vegjël.
