Mbrëmjen e sotme, regjisori i njohur Eduart Grishaj ka mbajtur në “Kinema Millenium” premierën e filmit të tij më të ri, të titulluar “Gjyshja”.
Të shumtë ishin miqtë e kolegët që u mblodhën për ta mbështetur Eduartin në këtë projekt të ri, i cili është duartrokitur shumë nga publiku.
Filmi “Gjyshja” flet për një histori të vërtetë dhe shumë prekëse, ku një vajze shtatzënë i kërkojnë të heqë fëmijën e saj për shkak të fjalëve të fshatit ku jetonin dhe frikës nga babai i vajzës së re.
Eduarti rrëfeu se këtë histori ia kishte treguar gjyshja e tij.
Regjisorit i kishin mbetur në mendje fjalët e profesorit të tij të masterit, Gjergj Xhuvanit, i cili i kishte thënë:
“Nëse do të shkruash një film, mos shko shumë larg.”
Për këtë arsye, Eduarti kishte zgjedhur një histori të dhimbshme e reale në veri të vendit tonë.
Sigurisht, ndër të tjera, ai s’mund të linte pa përmendur edhe muzën e tij të frymëzimit, me të cilën është i dashuruar kokë e këmbë, Arbana Osmanin.
Moderatorja e shoqëronte Eduartin gjatë premierës dhe ai iu drejtua asaj me fjalët “E mira ime më e madhe.”
Grishaj rrëfeu se Arbana e frymëzon, ndaj ne jemi të bindur se filmi i tij i ri do të jetë një sukses i vërtetë.
Filmi do të ketë pjesëmarrjen e aktorëve të njohur si Rita Gjeka, Ema Andrea, Çun Lajçi dhe Enxhi Cuku në rol kryesor.
