UEFA “tronditi” serbët me foton e tifozit shqiptar, e cila bëri xhiron e botës! Por kush është djali, i cili pikturoi të gjithë fytyrën e tij me flamurin shqiptar. Besmir Limani u bë i famshëm pas publikimit të fotos së tij dhe të gjithë u bënë kuriozë për ta njohur identitetin e tij.
Ai është me origjinë nga fshati Tatesh i Strugës, por jeton në Winthertur të Zvicrës, ndërsa për imazhin e tij si tifoz i flaktë i kombëtares shqiptare tani flet e gjithë media sportive evropiane.
Një rrëfim ekskluziv për portalin “Drini.mk”, në Maqedoni, Besmiri tregon emocionet mbi këtë situatë, duke theksuar se ai bën gjithçka që ndjen për kombëtaren shqiptare.
“Jam i zhgënjyer sepse meritonim më shumë në ndeshjen ndaj Zvicrës, por ky është futbolli. Kombëtaren e dua dhe do ta mbështes derisa të marr frymë. Përpiqem të ndjek çdo ndeshje të saj dhe kjo është një virtyt familjar i imi. Ne jemi të dhënë shumë mbas kombëtares por edhe flamurit kuq e zi në përgjithësi. Vizatimi i fytyrës me shqiponjën dykrenore është kthyer në një traditë për mua në çdo ndeshje të kombëtares. Atë e realizoj vetë dhe për ta bërë në mënyrën më të mirë humbas rreth 5 orë para pasqyrës duke shfrytëzuar ngjyrë speciale. Nuk duhet të zhgënjehemi kurrë, djemtë tanë e kanë kryer misionin, tani vetëm duhet të festojmë promovimin tonë në arenën ndërkombëtare të futbollit, të tregojmë vlerat tona kulturore fillimisht pastaj edhe ato sportive”, tregoi Besmiri.
