Krimi i rëndë në familje i ndodhur dy netë më parë në qytetin e Librazhdit mund të ketë pasur si shkak xhelozinë.
“Shqiptarja” raporton sot se Daut Gjokola 53 vjeç masakroi me thikë gruan e tij Luljeta Gjokola 49 vjeçe dhe më pas u vetëvra duke u hedhur nga kati i katërt i pallatit, për shkaqe xhelozie.
Djali i tyre 27-vjeçar është në gjendje të rëndë psikologjike dhe po merr trajtimin e nevojshëm mjekësor në QSUT që prej momentit kur u bë dëshmitar i krimit monstruoz.
Ai gjeti të masakruar me thikë nënën dhe u drejtua për ndihmë te fqinjët, por i ra të fikët.
Policia arrestoi në flagrancë burrin, por në momentin që po prisnin për të ardhur grupi për ta shoqëruar, Daut Gjokola u hodh nga ballkoni i apartamentit me pranga në duar duke gjetur vdekjen e menjëhershme.
Çifti Gjokola la pas dy fëmijë, një djalë dhe një vajzë 27 dhe 23 vjeç. Familja me katër anëtarë kishte një biznes të vogël, dhe pjesëtarët njiheshin si njerëz të qetë dhe të rregullt.
/Shqiptarja
