Një nga lojërat e preferuara të ndjekësve të “Shiko kush Luan” në “Top Channel” është padyshim “Haje ose ndaje”. Por, është njëherësh edhe më pak e preferuara e të ftuarve VIP, të cilët mesa duket ia nxijnë jetën Luanës për pyetjet e kësaj loje.
Loja në të cilën personazhet kanë mundësi ose t’u përgjigjen pyetjeve me spec, ose të pranojnë të hanë disa nga gjërat aspak të këndshme në tavolinë, mesa duket nuk do të jetë pjesë e sezonit të ri të “Shiko kush Luan”. Në një intervistë për “1 kafe me Labin”, autorja dhe moderatorja e spektaklit Luana Vjollca tha se po mendon seriozisht ta heqë sepse është lodhur nga të ftuarit të cilët i kërkojnë t’ia fshijë pyetjet.
“Ajo lojë është e tmerrshme. Pasi mbarojmë, vijnë më thonë: “Sa e mirë je, sa e bukur je. Shikoje pak atë pyetjen.”
Megjithatë, Luana u shpreh se nuk merret me këtë pjesë, pasi i takon stafit të saj.
Ajo tregoi gjithashtu se ftesa e saj nuk është refuzuar kurrë nga asnjë i ftuar, madje se ka nga ata që i shkruajnë për të qenë të ftuar në emision.
