Rihanna u zhduk për plot tre vite nga muzika.
Vetëm muajin e kaluar, na gënjeu mendjen duke u shfaqur si e dashura e Donald Glover tek videoja e shkëputur nga filmi- muzikal “Guava Island”, ku Rihanna është në rolin e Coffi-t.
Gjatë gjithë kësaj kohe, Rihanna ka qenë e angazhuar me hedhjen në treg të koleksioneve të reja të markës Fenty Beauty, të markës së të brendshmeve Savage X Fenty dhe së fundi, edhe të një linje veshjesh Fenty.
Por, për kë mendoi se tani Rihanna do t’i dedikohet vetëm biznesit dhe asgjëje tjetër, kjo nuk është në planet e këngëtares.
Madje, ajo zbuloi në një intervistë për “T Magazine” se pikërisht për këtë arsye, ka zgjedhur që bizneset e veta t’i quajë “Fenty”.
“Përdora “Fenty” që të mos duhet të thoni “Rihanna” për çdo gjë që kam bërë.”
Rihanna, do të jetë vetëm emri i artistes së albumit të saj të ardhshëm.
Këngëtarja zbuloi detaje nga projekti i ri muzikor, i cili nga fansat është pagëzuar me emrin “R9”, duke qenë i nënti album i saj.
“Jam gati ta quaj ashtu”, u shpreh Rihanna, “Sepse më kanë përndjekur me këtë “R9, R9”, “Kur do dalë R9-a?” Si mund t’i vë një emër tjetër, kur ma kanë damkosur tashmë këtë?”
Detajet e para për albumin e ri të Rihanna-s u publikuan në korrik të vitit të kaluar nga “Rolling Stones”, burime për të cilën u shprehën se Rihanna ka gati pa ekzagjerim 500 këngë, nga të cilat i duhet të përzgjidhte 10. Gjithashtu, u përfol se do të ishin këngë të rrymës reggae.
Këtë, e konfirmoi edhe në intervistën për “T Magazine”.
Gjithashtu, Rihanna sqaroi aludimet se në këtë album, do të ketë një bashkëpunim mes saj dhe Lady Gaga-s.
“Ndoshta ngaqë më ndoqi në Instagram… Për momentin nuk e kemi në axhendë, por nuk do isha kundër.”
…dhe për një bashkëpunim të tretë mes saj dhe Drake.
“Në këtë album jo, kjo është e sigurt.”, u shpreh Rihanna.
Albumi i saj i fundit, “ANTI”, u publikua në 2016-ën. U konsiderua një dështim në shitje e megjithatë, single-at e tij si “Work” me Drake apo “Love on the brain” u kthyen në superhite.
Në 29 maj, kompania e saj Fenty do të prezantojë në treg një markë luksi, duke e bërë Rihanna-n të parën grua në krye të një shtëpie mode luksi në Paris.
