Për ca vite, muzika tallava u limitua vetëm në club-et ku dëgjohet vetëm kjo lloj muzike.
Por, bashkëpunimi i ri i Encës me Muharrem Ahmetin, duket se ka shumë gjasa të rikthejë tallavanë në trendin e club-eve.
“Hajde”, u publikua sot duke sjellë për herë të parë bashkë, një prej këngëtareve më të njohura të skenës pop shqiptare, me një prej emrave më të famshëm (në mos po, më i famshmi) të muzikës tallava.
Videoja vë akoma më tepër në pah këtë ndërthurje: me vokalizat karakteristike të zgjatura të muzikës tallava të Muharrem Ahmetit, Enca kërcen në koreografi në një skenografi alla “Moulin Rouge”.
Ka patur një periudhë kur, mes hiteve të club-eve shqiptare, dominonin bashkëpunimet e artistëve më të vlerësuar me artistët e tallavasë.
E kush nuk e mban mend rikthimin e bujshëm të Aurela Gaçes në 2010-ën me “Origjinale” në bashkëpunim me Dr. Florin dhe Marselin? Kjo këngë dëgjohej literalisht kudo!
Dhe sigurisht, krijuesi i këtij hiti, Flori Mumajesi, e ktheu në trend asokohe ndërthurjen e dance-it me tallavanë, duke publikuar edhe këngën “Tallava”, e cila jo vetëm kërcehej dhe vazhdon kërcehet në çdo club, por tërhoqi edhe vëmendjen e këngëtares bullgare Stefani, e cila e ktheu në duet me kantautorin shqiptar në gjuhën sllave.
Kënga e re e Encës na kujton se muzika tallava nuk duhet zhvlerësuar, pavarësisht paragjykimeve që ekzistojnë ndaj saj. Artistët e tallavasë kanë treguar se janë talente të lindur, se “e kanë në gjak” dhe asgjë që buron nga shpirti s’mund të konsiderohet “jo cilësore” apo jashtë standarteve të muzikës moderne.
Dhe me shumë gjasë, “Hajde” do të pushtojë club-et, sepse sado ta mohojmë, të gjithë shkundemi me tallava, duke i hapur kështu rrugë rikthimit në modë të tallavasë së moderuar.
