Partia Demokratike e Italisë hodhi si kandidaturë në zgjedhjet për Parlamentin Europian një shqiptare: Geri Ballo. Ajo do të kandidojë në zgjedhjet e 23- 26 majit përballë Matteo Salvinit, një prej figurave më kontraverse në politikën e sotme italiane.
Jo vetëm është shqiptare, por Geri Ballo është treguar shumë e hapur sa i takon çështjes së emigrantëve, duke dalë shprehimisht kundra zëvendës kryeministrit të Italisë, Matteo Salvini.
“E konsideroj si një kandidaturë kundra- Salvini-t, sepse jemi në dy skaje të kundërt. Historia ime është dëshmia se gjërat nuk janë aspak siç i thotë ai.”
Salvini është i njohur në Itali për pikëpamjet ekstremiste, teksa ka dalë hapur kundër emigrantëve të paligjshëm në Itali dhe është shprehur kundër pranisë së Italisë në Bashkimin Europian. Në lidhje me këtë, Geri është shprehur:
“Të ndihesh europian është diçka shumë e bukur. Unë vij nga një vend i cili 30 vite më parë ishte nën një regjim shumë të egër. E kam të qartë se ç’do të thotë të qëndrosh pas mureve. Si ideal, Europa është gjithçka që s’duhet refuzuar. Përkundrazi, duhet t’u kthehemi ëndrrave si ëndrra europiane, për të mos rënë në cinizmin e shtrembër që Salvini përfaqëson.”
Geri Ballo, është vajza e gazetarit të njohur Artur Zheji.
Ajo u nis për në Itali duke ndjekur të ëmën, Tina, që shkoi atje pasi iu propozua një vend në një redaksi shqiptare në Romë. Por në fakt, çfarë gjeti ishte një mashtrim pasi puna që iu desh të bënte ishte ajo e pastrueses së shtëpisë.
Vetëm pasi e ëma më në fund mundi të gjente një punë të rregullt në një OJF, Geri mundi të shkonte në Itali, vendi që e kishte ëndërruar që e vogël teksa kapte fshehurazi frekuencat e “Rai 1”.
Geri Ballo studioi në Universitetin e Torinos, ku u diplomua në degën Marrëdhënie Ndërkombëtare. Më pas, vijoi një master në Politikë, Programe dhe Projekte Europiane.
Pas përfundimit të studimeve, Geri nisi punën në Ambasadën Shqiptare në Romë, kohë gjatë të cilat u angazhua me pakicat arbëreshe dhe shqiptarët në Itali.
Burimi: “La Repubblica”;“Globalist”
