Majori Klodian Tanushi, i cili mbeti i plagosur gjatë misionit në Letoni, ka ndërruar jetë.
Tanushi nuk mundi që t’u mbijetonte plagëve të marra si pasojë e shpërthimit të një mine gjatë misionit të forcave të NATO-s në Letoni.
Lajmi është bërë i ditur nga ministrja Olta Xhaçka, e cila shprehu ngushëllimet për familjen.
“Një lajm tjetër i dhimbshëm vjen nga Letonia. Komandanti i kontingjentit shqiptar në misionin e NATO “Enhanced Forward Presence”, major Klodian Tanushi humbi pak çaste më parë betejën e fundit me jetën. Me zemër e me shpirt i gjendemi pranë familjes, bashkëshortes e tri fëmijëve në këtë ditë zije. Do t’ju mungojë atyre, por do të na mungojë të gjithëve ne që patëm fatin ta njohim. Do mbetesh përjetë në mendjen e zemrën tonë Klodi, miku ynë!”, shkruan Xhaçka.
Katër ditë më parë humbi jetën nëntetarja Zarife Hasanaj, e cila u përcoll sot për në banesën e fundit, në varrezat e dëshmorëve.
