Përpjekiet e saj për ndryshime në drejtësine kriminalistike- për të nxjerrë nga burgu kriminelë jo të dhunshëm; vizitat në Shtëpinë e Bardhë; vendimi i fundit se do të nisë shkollën e drejtësisë- kanë çuditur njerëzit që janë mësuar ta shikojnë Kim Kardashian- in si një yll reality show dhe rrjetesh sociale.
Kështu, Kim ka vendosur që pasionin e saj për drejtësinë ta përcjellë aty ku di më mirë: në një tjetër reality show. Sipas “Variety”, një projekt i ri i titulluar “Kim Kardashian: Projekti i Drejtësisë”, do të ketë në qendër Kim Kardashian dhe një ekip ekspertësh të ligjit, me të cilët kohët e fundit ajo ka punuar për të lehtësuar dënimin e atyre që mbahen për akuza të lehta, veçanërisht në lidhje me sasi të vogla narkotikësh.
Kim do të jetë producente ekzekutive e këtij dokumentari me dy pjesë. Sipas përshkrimit: “ka në qendër përpjekiet e Kim Kardashian për të siguruar lirinë e amerikanëve të cilëve ajo beson se u është bërë padrejtësi nga sistemi.”
“TMZ” raportoi këtë javë se Kim dhe ekipi i saj i ekspertëve të ligjit kanë ndihmuar në lirimin e 17 të burgosurve, gjatë 3 muajve të fundit.
